"Macarıstanın baş naziri Viktor Orban açıq şəkildə Vladimir Putinin tərəfindədir, onun maraqlarına xidmət edir və Rusiya lideri kimi Avropanın təhlükəsizliyinə təhdiddir".
HİT.az xəbər verir ki, bunu Ukrinform-a müsahibəsində Avropa Parlamentinin Xarici Əlaqələr Komitəsinin üzvü, Avstriya Milli Alyansının (NEOS) üzvü Helmut Brandstetter deyib.
"Orbana bir an belə etibar etmək olmaz və Avropanın bu məsələdə fikir ayrılığı çox təəssüf doğurur. Slovakiyanın baş naziri Robert Fiko bir qədər ehtiyatlıdır, lakin Orban açıq şəkildə Putinin tərəfindədir - bunu birbaşa söyləmək lazımdır. Biz çoxdan Orbanın Avropa Şurasında səsvermə hüququndan məhrum edilməsini istəyirik ki, o, artıq Avropa İttifaqının qərarlarına mane olmasın", deyə Brandstetter bildirib.
Avropa Parlamentinin deputatı təəssüfləndiyini bildirib ki, bu hələ edilməyib:
"Ancaq düşünürəm ki, biz daha aydın danışmalıyıq. Deməliyik ki, Orban Putinin maraqlarına xidmət edir, ona görə də o, Avropa İttifaqına qarşıdır. O, bizim təhlükəsizliyimizə qarşıdır. Orban da Putin qədər təhlükəsizliyimizə təhdiddir. Biz bunu kifayət qədər aydın ifadə etmirik. Fikrimcə, daha aydın danışmalıyıq".
Macarıstan baş nazirinin Ukrayna ilə bağlı açıqlamalarını şərh edən Avropa Parlamentinin deputatı qeyd edib ki, Orban, əslində, artıq seçki kampaniyasındadır və göstərmək istəyir ki, qarşıdakı illər üçün sülhün qarantı tək odur, rəqibi Peter Maqyar isə yox.
Macarıstanın baş naziri Viktor Orban Ukraynanın Aİ-yə üzvlük perspektivlərini qəti şəkildə inkar edir, çünki onun fikrincə, bu, bütün Avropa İttifaqı üçün müharibə riski yaradar. Orban Ukraynanı Aİ ilə Rusiya Federasiyası arasında “bufer dövlət” kimi görür. Macarıstan Aİ-yə daxil olmaq üzrə danışıqlarda ilk klasterin açılmasına səs verməyərək, Ukraynanın Avropaya inteqrasiyasını əngəlləməkdə davam edir.
NATO-nun Haaqa sammitində Macarıstanın baş naziri Viktor Orban Rusiyanı Avropa təhlükəsizliyinə ən böyük təhdid adlandırmaqdan imtina edib və bəyan edib ki, əsas təhlükə dünya ticarətində rəqabət qabiliyyətinin itirilməsidir.
Macarıstan da vaxtaşırı Aİ-nin Rusiyaya qarşı sanksiyalar və Ukraynaya maliyyə dəstəyi ilə bağlı qərarlarını bloklayır.
Samir
