Hindistanın neft naziri Hardeep Puri bildirib ki, Hindistanın Rusiyadan “qara qızıl” idxal etməsi dünya iqtisadiyyatını qiymət artımından xilas etməyə kömək edib.

HİT.az bu barədə "Bloomberg"ə istinadən xəbər verir. 

"Hindistanın bütün beynəlxalq normalara riayət etməsi barel üçün 200 dollarlıq fəlakətli şokun qarşısını aldı. Bəzi tənqidçilər Hindistanın Rusiya nefti üçün "çamaşırxanaya" çevrildiyini iddia edirlər. Bu, həqiqətdən uzaqdır", deyə Puri "The Hindu" qəzetindəki köşə yazısında qeyd edib.

Onun sözlərinə görə, Hindistan qaydaları pozmayıb və Moskvanın gəlirlərini məhdudlaşdırmaq, eyni zamanda neft tədarükünü qorumaq üçün G7 ölkələrinin tətbiq etdiyi qiymət tavanı mexanizmi çərçivəsində hərəkət edir: "Hindistan bazarları sabitləşdirdi və dünya qiymətlərinin artmasının qarşısını aldı".

"Reuters" agentliyinin məlumatına görə, Hindistan dəniz yolu ilə daşınan Rusiya neftinin ən böyük alıcısına çevrilib. Avropa ölkələri və ABŞ 2022-ci ilin fevralında Ukraynanı işğal etdiyi üçün Rusiyaya qarşı sanksiyalar tətbiq etdikdən sonra Moskva yeni alıcılar axtardığı üçün Yeni Dehli neft endirimlərindən yararlanıb.

Hindistanın neft nazirinin sözlərinə görə, Hindistan nefti ilə hər bir əməliyyat "qanuni daşınma və sığorta, uyğun treyderlər və təsdiqlənmiş kanallar" vasitəsilə həyata keçirilir.

“Həqiqət budur ki, dünya neftinin demək olar ki, 10%-ni təmin edən dünyanın ikinci ən böyük istehsalçısını heç nə əvəz edə bilməz”, deyə o əlavə edib.

Samir