Avropalı hərbi liderlər Ukraynada quru qüvvələrinin iki qrupundan ibarət sülhməramlıların yerləşdirilməsi üçün ətraflı plan hazırlayıblar: biri Ukrayna ordusuna təlim vermək və dəstəkləmək, ikincisi, Rusiyanın mümkün gələcək işğalının qarşısını almaq üçün nəzərdə tutulmuş ayrıca "zəmanət" qüvvəsi olacaq.

HİT.az xəbər verir ki, bu barədə “The Wall Street Journal” adının açıqlanmasını istəməyən avropalı diplomata istinadən yazıb.

Nəşr yazır ki, hazırkı planda Ukrayna səmasında hava patrullarının ölkə hüdudlarından kənarda yerləşən qüvvələr tərəfindən həyata keçiriləcəyi vurğulanmaqla, artıq 10 mindən çox hərbçinin yerləşdirilməsi nəzərdə tutulur.

Planlar 35 ölkədən rəsmilərin, bəzi ABŞ generallarının və NATO-nun əməliyyat komandanlığının rəhbərinin qatıldığı sammitdə müzakirə edilib.

Məlumata görə, Donald Tramp son vaxtlar ABŞ-ın Ukraynaya hansısa formada təhlükəsizlik təminatı verməsi ideyasını daha çox qəbul edib, lakin bu dəstəyin necə olacağı barədə qeyri-müəyyən qalıb. Keçən ay o, ABŞ-ın Ukraynada Avropa təhlükəsizlik qüvvələrini dəstəkləmək üçün hava gücündən istifadə etməyə hazır olduğunu bildirsə də, ABŞ-ın quru qoşunlarını yerləşdirməyi istisna edib.

Avropa rəsmiləri əmindirlər ki, ABŞ Ukraynaya kəşfiyyat və informasiya dəstəyini davam etdirəcək.

Samir