ABŞ-ın energetika naziri Kris Rayt bildirib ki, Avropa İttifaqının Rusiya neft və qazının idxalını dayandırması ABŞ-ın Rusiyaya qarşı daha sərt sanksiyalar tətbiq etməsində əsas amil ola bilər.

HİT.az xəbər verir ki, bu barədə "Financial Times" yazıb.

Rayt qeyd edib ki, Avropa ölkələri Rusiya qazı və neftindən tamamilə imtina etdiklərini bəyan etsələr, bu, Vaşinqtonun mövqeyinə əhəmiyyətli təsir göstərəcək. Rayt həmçinin bildirib ki, ABŞ və Aİ arasında bu yaxınlarda əldə edilmiş ticarət razılaşmasının şərtlərini yerinə yetirmək üçün Avropa ölkələri Amerikadan mayeləşdirilmiş təbii qaz (LNG), benzin və digər qalıq yanacaq növlərini aktiv şəkildə almalıdır.

Avqustun sonunda tərəflər Aİ-nin sənaye mallarına rüsumların ləğvini və ABŞ-da əksər Avropa mallarına 15% rüsumun saxlanmasını nəzərdə tutan çərçivə sazişi elan ediblər.

Bundan əlavə, Aİ 2028-ci ilə qədər ABŞ-dan təxminən 750 milyard dollar dəyərində LNG, neft və nüvə enerjisi məhsulları almaq, həmçinin ən azı 40 milyard dollar dəyərində məlumat mərkəzləri üçün Amerika çipləri almaq niyyətindədir.

Bu sazişin bir hissəsi kimi Avropa da ABŞ-dan hərbi və müdafiə texnikası alışını əhəmiyyətli dərəcədə artırmağı planlaşdırır ki, bu da geosiyasi gərginlik şəraitində strateji yaxınlaşma və transatlantik əməkdaşlığın artmasından xəbər verir.

Samir