Əgər bir milyarderin sərvətini yalnız bu gün əlinə götürə biləcəyi nağd pula endirsəniz, yəqin ki, bir az məyus olardınız. Ultra-zəngin insanlar ömür boyu təsəvvür etdiyiniz kimi banklarda və ya anbarlarda pul yığını saxlamırlar. Əksər milyonçular və milyarderlər üçün imperiyalarının əsas hissəsini səhmlər və əmlak təşkil edir. Onların əlində olan nağd pul isə bununla müqayisədə olduqca azdır.

Milyarderlər nə qədər nağd pul saxlayırlar?

ABŞ-da aparılan bir U.S. Trust sorğusu göstərib ki, 3 milyon dollardan çox sərvətə malik varlı investorlar adətən aktivlərinin təxminən 15%-ni və ya daha çoxunu nağd şəkildə saxlayırlar. Amma milyarderlər üçün bu rəqəm adətən on milyonlarla və ya bir neçə yüz milyon dollar aralığında olur və çox vaxt ümumi sərvətin 5 faizindən də azını təşkil edir. Başqa insanlar üçün bu, təsəvvür edilməyəcək qədər böyük sərvət sayıla bilər. Amma 50 və ya 100 milyard dollarlıq ümumi sərvətlə müqayisədə isə təəccüblü dərəcədə az görünür.

Qalan pul harada yerləşir?

Milyarderin sərvətinin əsas hissəsi aşağıdakı aktivlərdə cəmlənir:

1. İctimai şirkətlərdə paylar

2. Özəl bizneslərin mülkiyyəti

3. Daşınmaz əmlak portfelləri

4. İnvestisiya fondları

5. İncəsənət kolleksiyaları və digər lüks aktivlər

Bəs onlar niyə pulu yatırım edərək saxlayır?

Nağd pul dəyər itirir – İnflyasiya səbəbindən pulun alıcılıq qabiliyyəti ildən-ilə azalır. Məsələn, 100 milyon dolları illərlə bankda saxlamaq, əslində, o pulun real dəyərinin azalması deməkdir.
Aktivlər qazanc gətirir – Səhmlər, bizneslər və daşınmaz əmlak həm dəyərini artırır, həm də əlavə gəlir (dividend, kirayə, mənfəət və s.) gətirir. Nağd pul isə sadəcə dayanır.
Vergi üstünlükləri – Bir çox ölkədə sərvəti aktivlərdə saxlamaq daha sərfəlidir. Məsələn, biznes və ya daşınmaz əmlak üzərindən gəlir vergisi, nağd pul üzərindəki vergilərdən fərqli işləyə bilər.
Etibar və nüfuz – Milyarderlər üçün bizneslərdə və böyük layihələrdə iştirak etmək həm gəlir, həm də nüfuz qazandırır. Bu, sərvəti artırmaqdan əlavə, onların adını gücləndirir.
Likvidlik problemi yoxdur – Onlar lazım olanda banklardan böyük məbləğlərdə kredit götürə bilirlər, çünki aktivləri girov qoya bilirlər. Bu səbəbdən nağd pula çox ehtiyac duymurlar.
Yəni qısaca: nağd pul passivdir, aktivlər isə həm sərvəti qoruyur, həm də artırır.//valyuta.az