Hindistanın ticarət naziri Piyuş Qoyal bildirib ki, ölkə ABŞ-dan neft və qaz alışını artırmaq niyyətindədir. Beləliklə, Yeni Dehli Vaşinqtonu ticarət sazişi bağlamağa təşviq edir.

HİT.az xəbər verir ki, bunu "Bloomberg" yazıb.

"Biz yaxın illərdə ABŞ-la enerji məhsulları üzrə ticarətimizi artırmağı gözləyirik. Və biz yaxın dost, təbii tərəfdaş olduğumuz üçün enerji təhlükəsizliyi sahəsində hədəflərimizə ABŞ-ın cəlb edilməsi daxildir", deyə Qoyal deyib.

Onun sözlərinə görə, ABŞ Hindistanın enerji mənbələrinin şaxələndirilməsində və sabitliyinin təmin edilməsində həlledici rol oynayır.

Nəşr qeyd edir ki, nazir prezident Donald Trampın avqust ayında Hindistan ixracatına 50% rüsum tətbiq etməsindən sonra həmkarları ilə görüşmək üçün ABŞ-a səfər edir və bunu Yeni Dehlini Rusiya neftini aldığına görə cəzalandırması ilə izah edir. Tramp administrasiyası iddia edir ki, Hindistan Rusiyadan “qara qızıl” almaqla Rusiyanın Ukraynaya qarşı müharibəsini maliyyələşdirməyə kömək edir.

"ABŞ-dan neft və qaz idxalının artırılması ölkələr arasında ticarət danışıqlarını asanlaşdıracaq", deyə nəşr qeyd edir.

Avqustun 27-də ABŞ prezidenti Donald Tramp Hindistandan gələn mallara rüsumları iki dəfə artıraraq bunu Yeni Dehlinin Rusiya neftini alması ilə izah edib. Vaşinqtonun Hindistana tariflər tətbiq etmək qərarı iki ölkə arasında kənd təsərrüfatı kimi mübahisəli məsələlərə görə yeni ticarət sazişi üzrə danışıqların dalana dirənməsindən sonra verilib.

Trampın yeni tariflərlə hədələməsindən sonra Hindistan neft emalı zavodları Rusiya neftinin alışını müvəqqəti olaraq dayandırıb. Bununla belə, Hindistanın baş naziri ilə ABŞ prezidenti arasında şəxsi mübahisəni və ticarət danışıqlarında irəliləyişin olmadığını nəzərə alaraq, Hindistan rəsmiləri Rusiya neftini almağa davam edəcəklərini bildiriblər.

Samir