Kaliforniya Texnologiya İnstitutunun tədqiqatçıları Yupiterin hidroloji dövrünün yeni kompüter modelini yaradıblar. Belə çıxır ki, su buxarı buludlara çevrilir və nəhəng planetin təlatümlü atmosferinə yağış kimi düşür.

HİT.az xəbər verir ki, bu barədə "Proceedings of the National Academy of Sciences" (PNAS) jurnalında dərc olunub.

Modelləşdirmə nəticələri suyun Yupiterdə qeyri-bərabər paylandığını göstərib. Bu, alimlərə suyun Yerə necə çata biləcəyini anlamağa kömək edəcək, çünki Yupiter Günəş Sistemində yaranan və digər planetlərin orbitlərinə təsir edən ilk planetdir.

"Biz bütün diqqətimizi Yupiterə yönəltməklə yanaşı, son nəticədə digər planetlərə, o cümlədən ekzoplanetlərə tətbiq oluna bilən su və atmosfer dinamikası nəzəriyyəsini inkişaf etdirmək istəyirik", deyə məqalənin aparıcı müəllifi, professor Endryu İnqersoll qrupunun doktoranturadan sonrakı əməkdaşı Huazhi Ge izah edib.

Yupiterin sürətli fırlanması - orada bir gün cəmi 10 saat davam edir - atmosferində görünən turbulent zolaqlar yaradır. Yeni modelə görə, subtropiklərdə və orta enliklərdə turbulentlik yağışa gətirib çıxarır ki, bu da suyu daha dərinə aparır və atmosferin aşağı təbəqəsini daha rütubətli edir.

Alimlər modeli bütün planetə genişləndirməyi və onun metan kimi kimyəvi maddələrin qeyri-bərabər paylanmasının müşahidə olunduğu digər qaz nəhəngləri - Uran və Neptun üçün də tətbiqini yoxlamağı planlaşdırırlar.

Samir