Atlantik və Sakit okeanın şərqində fırtınalar və qasırğalar davam edərkən, Avropa öz ekstremal hava şəraitinə məruz qalıb. 

HİT.az xəbər verir ki, "The Guardian"ın yazdığına görə, həftənin ortasında Aralıq dənizi üzərində yaranan alçaq təzyiq sistemi şimal-şərqə, yəni Cənub-şərqi Avropaya doğru hərəkət edib və bölgəyə leysan, ildırım və davamlı yağışlar gətirib.

Proqnozlara görə, bu sistem oktyabrın 3-dək təsirini saxlayacaq və Balkan yarımadasının böyük hissəsinə 48 saat ərzində 80-130 millimetr yağıntı düşəcək.

Məlumatda qeyd olunur ki, Serbiya, cənub-qərbi Rumıniya, şimal-şərqi Yunanıstan, Dodekanes adaları və Şimal Egey dənizi adaları üçün "qırmızı hava xəbərdarlıqları" verilib. Daşqın və həyat üçün təhlükə riski xüsusilə vurğulanır. Güclü küləklər İon dənizindəki Zakinthos adasında məktəblərin bağlanmasına səbəb olub.

Şərqi Avropadan daxil olan soyuq hava isə vəziyyəti daha da ağırlaşdırıb. Nəticədə Dinar dağlarında güclü qar yağışı başlayıb və bəzi modellərə görə həftəsonuna qədər qar örtüyünün hündürlüyü 80 sm-ə çata bilər.

"The Guardian" xatırladır ki, həftənin əvvəlində Şərqi İspaniya və Balear adaları da daşqınlarla üzləşib. Keçmiş "Qabriyel" qasırğasının qalıqları İberiya yarımadasını keçərək Balear dənizi üzərində dayanıb. Xüsusilə Valensiya və İbiza əziyyət çəkib: Qandiyada 12 saatda 356,8 mm yağıntı qeydə alınıb ki, bu da sentyabr ayının orta göstəricisindən on dəfə çoxdur. İbizada isə 24 saatda 254 mm yağıntı müşahidə olunub ki, bu da 1952-ci ildən bəri ən rütubətli gün olub.

Eyni zamanda, bu həftə "Bualoy" tayfunu Vyetnamın mərkəzi hissəsini vurub. Güclü yağış, külək və nəhəng dalğalar nəticəsində ölkənin şimal bölgələrində qəfil daşqınlar və torpaq sürüşmələri baş verib, 3000-dən çox yol bağlanıb. Onlarla kənd təcrid olunub, çoxsaylı aviareyslər ləğv edilib, Hano ilə Hoşimin şəhəri arasında dəmir yolu hərəkəti dayandırılıb.

Rəsmi məlumatlara görə, 36 nəfər həlak olub, 147 nəfər yaralanıb, 21 nəfər isə itkin düşmüş hesab olunur. 210 mindən çox ev dağılıb və ya su altında qalıb, 51 min hektardan artıq əkin sahəsi məhv edilib. Vyetnam hökuməti "Bualoy" tayfununun bu həftəki ziyanını 350 milyon dollardan çox qiymətləndirib.

Samir