İngiltərənin Kotsvolds təpələri ətrafında yerləşən yaşayış məntəqələrinin sakinləri tikintidə kiçik dəyişikliklərə hətta icazə tələb edən yeni sərt tikinti qaydalarından şikayətlənirlər. 

HİT.az xəbər verir ki, bu barədə "Express" qəzeti yazır.

"Bricit Consun Gündəliyi" filmində görünən Snovşill kəndi tez-tez Kotswolds təpələrinin "incisi" adlanır. Lakin indi o, Tüksberi rayon şurasının 4-cü maddəsinin tələblərinə tabedir ki, bu da onun mədəni irsini qorumaq məqsədilə sərt qaydalar tətbiq edir.

Nəşr qeyd edib: "Bu o deməkdir ki, daşınmaz əmlakda aparılan az qala hər hansı bir iş və ya dəyişiklik – hətta patio (yaşayış binasının açıq daxili həyəti) quraşdırılması və ya xarici divarın rənginin dəyişdirilməsi belə şura tərəfindən təsdiqlənməlidir".

"Gloucestershire Live"ın xəbər verdiyinə görə, icazə tələb edən əlavə dəyişikliklərə xarici pəncərə və qapıların dəyişdirilməsi, eyvan tikintisi, çardaq pəncərələrinin quraşdırılması, dam örtüyü materiallarının dəyişdirilməsi və ya bağlarda sərt səthlərin dəyişdirilməsi daxildir.

Bundan əlavə, yerli sakinlər qapı, hasar və ya divar quraşdırmaq, binaların xarici səthlərini fərqli rəngə boyamaq və ya antenlərin, günəş panellərinin quraşdırılması və dəyişdirilməsi üçün də icazə almalıdırlar.

Eyni zamanda, bəzi sakinlər yeni qaydaların çox bahalı və məhdudlaşdırıcı olduğundan narahatlıq keçirirlər, digərləri isə onların çox gec tətbiq edildiyini söyləyirlər.

Xüsusilə, dörd il əvvəl ailəsi ilə birlikdə Snovşillə köçən 40 yaşlı yerli sakin Roz belə təkliflərə qarşı çıxır və onları həddindən artıq nəzarətçi adlandırır.

Qadının sözlərinə görə, onlar bu daşınmaz əmlakı aldıqda, o, tərk edilmiş vəziyyətdə idi, buna görə də onu təmir etmək məcburiyyətində qaldılar: "Etiraz məktubu yazdım, amma yenə də qəbul edildi. Bu çox ağrılı bir proses idi. İndi bir hasar quraşdırmaq istəsək, bu, sanki dağa dırmaşmığımız kimi bir şeydir".

Roz həmçinin deyir ki, ən böyük problem "sərhədi aşan" turistlərdir: "Kəndin xarakterini dəyişən turizmdir, evdəki dəyişikliklər deyil. Kəndi turistlər üçün qorumaq ən yaxşı məntiq deyil".

Kənddə 40 ildir yaşayan Kim isə yeni qaydalar barədə ziddiyyətli fikirlərə malikdir.

"Bunu necə tənzimləyəcəklər? Ancaq kimsə şikayət etsə. Əgər sizin kiçik uşaqlarınız varsa və hasarınıza bir şey olubsa, uşağınızı və ətrafınızdakı insanları qorumaq istədiyiniz halda niyə planlaşdırma prosedurundan keçməlisiniz? Giriş qapısını dəyişə bilməzsiniz, bəs ona ziyan dəysə nə etməli? 4-cü maddəyə uyğun planlaşdırma, planlaşdırma müraciətindən daha baha başa gəlir. İnsanların Kotsvoldsi qorumaq istədiyini başa düşürəm, amma balans tapmaq lazımdır, baxmayaraq ki, düşünürəm ki, insanlar evləri ilə istədiklərini edəcəklər", deyə qadın bildirib.

Eyni zamanda, 85 yaşlı Şeyla Vilks və 84 yaşlı həyat yoldaşı Piter Vilks bu qaydaları müsbət hesab etsələr də, kəndlərinin artıq buraya tətil etməyə gələn kirayəçilər tərəfindən "dağıdıldığını" söyləyirlər.

"Onlar çox gec gəldilər. Kəndi dağıtdılar. Bütün həyatım boyu, 80 il burada yaşamışam və sadəcə hesab edirəm ki, insanlar buradan sui-istifadə ediblər. Dəyişiklikləri sevmirəm və əlimizdə olanı qorumağımız lazım olduğunu düşünürəm. Belə gözəl bir yerdə yaşadığımız üçün insanlar onu olduğu kimi saxlamalıdırlar", deyə Şeyla qeyd edib.

Öz növbəsində, Rayon Şurasının Planlaşdırma və İnkişaf üzrə aparıcı üzvü Sara Hends bildirib:

"Snovşill rayonumuzun incilərindən biridir və bu səlahiyyətlər onun irsini qorumağa, eyni zamanda düşünülmüş və uyğun inkişafa imkan verməyə kömək edəcək. Məşvərətlərdə iştirak edən və bu qərarın formalaşmasına kömək edən hər kəsə minnədarıq".

Samir