ABŞ prezidenti Donald Tramp Yaxın Şərqdə girovların uğurlu mübadiləsindən sonra Ukraynada sülhün əldə olunmasının mümkünlüyünə nikbin baxır.

HİT.az xəbər verir ki, bu barədə Ağ Evin adının çəkilməsini istəməyən nümayəndəsinə istinadən "Politico" məlumat yayıb.

"Prezident Tramp girovları azad etdiyi və İsraillə HƏMAS arasında müharibəyə son qoyduğu kimi, Rusiya və Ukrayna arasında müharibəyə son qoymaq arzusunu çoxdan ifadə edib”, deyə mənbə bildirib.

Nəşr qeyd edir ki, Ukrayna prezidenti Volodimir Zelenski Tramp administrasiyasının müsbət sülh nailiyyətlərindən yararlanmağa can atıb və çərşənbə axşamı xalqa müraciətində hazırda dünyada “sülh üçün güclü təkan” olduğunu bildirib. Ağ Ev rəsmisi vurğulayıb ki, Rusiya hərbi və iqtisadi mövqeyinə görə danışıqlar masasına gəlmək üçün motivasiya olmalıdır:

"Prezident Trampın dediyi kimi, iqtisadiyyatı bərbad vəziyyətdə olan və “faktiki olaraq heç bir ərazi qazancı əldə etməyən” minlərlə insanın həyatını itirməyə davam edən Rusiya üçün müharibə yaxşı getmir. Əgər onlar ağıllı olsaydılar, Rusiyanın reputasiyasına ciddi ziyan vuran müharibəni dayandırmaq, qətli dayandırmaq və ölkələrini yoluna qaytarmaq üçün razılığa gəlmək üçün daha çox səy göstərərdilər, prezident Putin Rusiya üçün faydalı ola biləcək səxavətli sülh təkliflərini dəfələrlə rədd edib".

O əlavə edib ki, Tramp hər iki tərəfi mənasız qətli dayandırmağa inandıra biləcəyinə nikbin və ümidlidir.

Qeyd edilir ki, Amerika prezidentinin Yaxın Şərqdə irəliləyişi onun öz diplomatik iddialılığını gücləndirmiş ola bilərdi, lakin indiyədək Rusiya onun sülhməramlı səylərinə böyük ölçüdə reaksiya vermir.

Cümə günü Trampın Zelenski ilə görüşü planlaşdırılır ki, bu da ABŞ prezident administrasiyasının diqqətini Yaxın Şərqdən Rusiyaya yönəltmək məqsədi daşıyan Ukrayna səylərinin bir hissəsidir.

Samir