"Vaşinqton Çin iqtisadiyyatına zərər vurmağa çalışmır və ticarət əlaqələrinin daha da gərginləşməsinin qarşısını almağa ümid edir".

HİT.az xəbər verir ki, bu barədə ABŞ-ın maliyyə naziri Skott Bessent CNBC telekanalında bildirib.

"Biz onların iqtisadiyyatına zərər vermək istəmirik və biz eskalasiya axtarmırıq. Onların bizim iqtisadiyyata zərər vermək istədiklərinə inanmırıq, lakin bu, əmr-nəzarət iqtisadiyyatıdır və onlar bizə əmr və ya nəzarət etməyəcəklər", deyə nazir bildirib.

Bessent qeyd edib ki, Birləşmiş Ştatlar Pekinə bir çox təsir rıçaqlarına malikdir və onun sərəncamında nadir torpaq metalları üzrə ixrac məhdudiyyətlərindən qat-qat güclü alətlərə malikdir. O, əlavə edib ki, birja bazarındakı eniş ABŞ-ın Çinə qarşı sərt tədbirlər görməsinə mane olmayacaq.

Oktyabrın 10-da ABŞ prezidenti Donald Tramp mövcud tariflərə əlavə olaraq, noyabrın 1-dən etibarən Çindən gələn bütün mallara 100% gömrük rüsumunun tətbiq ediləcəyini açıqlayıb. Amerika lideri həmçinin “kritik proqram təminatı” üzrə ixrac nəzarətinin tətbiq olunduğunu açıqlayıb. Bu tədbirlər Çinin ticarətlə bağlı “son dərəcə aqressiv mövqeyinə” cavab olaraq təqdim edilib.

Qərar, Çinin qlobal bazarın 70%-nə nəzarət etdiyi nadir torpaq metallarının hasilatı və emalı texnologiyalarına Pekinin ixrac nəzarətini tətbiq etməsindən sonra verilib. Trampın açıqlaması ABŞ fond bazarında 1,65 trilyon dollarlıq bazar kapitallaşması itkisi ilə çökməyə səbəb oldu.

Samir