Ukrayna hərbçiləri cəbhədə qədim 155 millimetrlik "M114" haubitsalardan fəal şəkildə istifadə edirlər.

Hit.az xəbər verir ki, onların arasında lafeti və lüləsi hələ 1944-cü ildə istehsal edilmiş bir haubitsa da aşkarlanıb. Bu barədə "Defense Express" nəşri məlumat yayıb.

Bildirilib ki, həmin nadir haubitsanın görüntülərini "Sosial-məişət jurnalı "Vodohrai" adlı "Telegram" kanalı paylaşıb. Qeyd olunur ki, silah üzərində hələ də köhnə lövhə saxlanılıb – "Howitzer 155M.M. M1A1". Bu haubitsa "Qərb" əməliyyat komandanlığı bölməsinin təlim atışları zamanı istifadə olunub.

Məqalədə vurğulanır ki, ilk baxışdan bu haubitsanın yalnız arxa bölgələrdə şəxsi heyətin hazırlığı üçün istifadə edildiyi düşünülə bilərdi. Lakin "M114A1" daha sonra Ukrayna Silahlı Qüvvələrinin Quru Qoşunlarının 152-ci ayrı-ayrı yeqer briqadasının döyüşçülərində də müşahidə olunub. Bundan başqa, "NİP "Tisk" adlı ictimaiyyət platformasının məlumatına görə, bu haubitsalar artıq Pokrovsk istiqamətində də tətbiq edilib.

Nəşr əlavə edib ki, bu tip haubitsalar adətən qapalı mövqelərdə yerləşdirilir ki, bu da onları düşmən atəşindən daha yaxşı qoruyur və gizlənmə imkanlarını artırır.

"Defense Express" qeyd edir ki, "M114" haubitsalarının əsas problemi onların texniki göstəricilərində deyil, ehtiyat lülələrin mövcudluğu və texniki vəziyyətindədir.

Eyni zamanda, nəşr xatırladır ki, artilleriya Ukraynada dron dövründə də “müharibənin tanrısı” olaraq qalır. "The Wall Street Journal" yazır ki, döyüş meydanını pilotsuz uçuş aparatları bürüsə də, iriçaplı artilleriya sistemləri hələ də mühüm üstünlüklərə malikdir — xüsusilə atəş gücü baxımından. 93-cü mexanikləşdirilmiş briqadanın dron operatoru, kiçik serjant İvan Kornienko bildirib ki, dronlar asanlıqla sıradan çıxarıla və ya hava şəraitindən təsirlənə bilər, bu isə artilleriyanı daha etibarlı silaha çevirir.

Samir