Donald Tramp administrasiyası on minlərlə ABŞ Milli Qvardiya əsgərini daxili əməliyyatlar üçün, o cümlədən iğtişaşlara və küçə etirazlarına cavab vermək üçün hazırlamağı planlaşdırır. 

HİT.az xəbər verir ki, bu barədə "Wall Street Journal", "Washington Post"və "The Guardian" qəzetləri məlumat yayıb.

Jurnalistlərin məlumatına görə, Pentaqon katibi Pit Heqset ölkə daxilində "sürətli reaksiya qüvvəsi"nin yaradılmasını əmr edib. Ümumilikdə, bu, izdihamın idarə olunması, həbslər və dəyənək və elektroşokerlərin istifadəsi üzrə xüsusi təlim keçmiş 20.000-dən çox əsgəri əhatə edəcək.

Milli Qvardiya rəsmi olaraq ştat qubernatorlarına tabedir, lakin "milli təhlükəsizlik və ya ictimai asayiş"ə təhlükə yaranarsa, prezident onu federal komandanlıq altına verə bilər.

Tramp artıq bu səlahiyyətdən bir neçə dəfə istifadə edib. Son aylarda yerli hakimiyyət orqanlarının etirazlarına baxmayaraq, o, Milli Qvardiya qoşunlarını Los-Anceles, Portland, Çikaqo və Vaşinqtona yerləşdirib. Bu əməliyyatların bəziləri sonradan məhkəmələr tərəfindən qanunsuz hesab edilib.

Tramp Yaponiyaya səfəri zamanı bildirib ki, vəziyyətin nəzarətdən çıxdığı şəhərlərimiz var. Biz insanlarımızı ora göndərib asayişi bərpa edəcəyik.

Milli Qvardiya ənənəvi olaraq təbii fəlakətlərdə və fövqəladə hallarda istifadə edilən ABŞ hərbi ehtiyatının bir hissəsidir.

Samir