Avropanın müxtəlif şəhərlərində noyabrın ortalarından etibarən Milad yarmarkaları açılmağa başlayır. Bu yarmarkalar parlaq işıqları, bəzəkli suvenirləri, bayram ovqatlı musiqiləri, aromatik qlintoeynləri və ləzzətli qəlyanaltıları ilə turistləri cəlb edir.

HİT.az xəbər verir ki, Almaniyadan olan "GetYourGuide" şirkətinin eksperti Maren Şullerus dünyanın müxtəlif yerlərində 60-dan çox Milad yarmarkasını ziyarət etdikdən sonra "Daily Mirror" nəşrinə ideal qış tətili üçün düzgün yeri seçməyin əsas meyarlarını açıqlayıb.

O, izdihamdan qaçmaq istəyənlər üçün ən münasib vaxtın iş günləri, dekabrın ortaları və təxminən saat 16:00 olduğunu bildirib: "Bu saatlarda uşaqlar hələ məktəbdə olur və hava artıq qaralmağa başlayır, bu da bayram ab-havasını daha çox hiss etməyə imkan verir".

Daha sakit və romantik mühit axtaranlara ekspert Hamburqdakı Santa-Pauli Milad bazarını tövsiyə edib. Bu bazar əsasən böyüklər üçün nəzərdə tutulub və “burlesk tipli Yeni il bəzəyi şouları” kimi əyləncəli proqramlar təqdim edir.

Ekspert ziyarətçiləri turist tələlərindən çəkinməyə çağırıb və əsl əl işlərini fabrik məhsullarından fərqləndirməyin yollarını izah edib: Əgər suvenir alırsınızsa, bir neçə məqam vacibdir: birincisi, foto çəkməyə icazə verilməyən piştaxtalara baxın; ikincisi, satıcıdan məhsulun necə hazırlandığını soruşun; üçüncüsü, alışdan əvvəl əşyaya toxunmağa və yaxından baxmağa icazə verilməlidir".

Təcrübəli səyahətçi turistlərə isti geyinməyi məsləhət görür, çünki bəzi bölgələrdə hava temperaturu -15°C-yə qədər enə bilər. Əlləri isitmək üçün xüsusi istilik yastıqları da faydalı ola bilər. Bundan əlavə, yarmarkaya həm bank kartı, həm də nağd pul aparmaq tövsiyə olunur, çünki bəzi satıcılar yalnız nağd ödəniş qəbul edir və yarmarka ərazisindəki bankomatlar adətən komissiya haqqı tutur.

Maren, qlintoeyndən sonra baş ağrısından qorxanlara "Winzer-Glühwein" seçməyi məsləhət görür: "Bu, yerli şərabçılıqlarda istehsal olunan təbii şərabdan hazırlanır. Belə stendlərdə adətən ‘Winzer’ (şərabçı) qeyd olunur. Belə qlintoeyn daha dadlı olur və baş ağrısı yaratmır".

Samir