Kruiz gəmiləri o qədər nəhəngdirlər ki, bəziləri hətta aviadaşıyıcılardan da böyükdür, lakin onlar da əbədi deyillər. Xidmət müddəti başa çatdıqda, kruiz şirkətlərinin onlarla nə edə biləcəyi barədə bir neçə seçimi olur. 

HİT.az xəbər verir k, Slashgear.com portalı xidmətdən çıxarılmış kruiz laynerlərinin talehini və onların son səfərinin harada baş verdiyini izah edib.

Kruiz şirkətlərinin hansı seçimləri var?

Bəli, kruiz şirkətləri bəzən xidmətdən çıxarılmış gəmiləri başqa şirkətlərə satırlar, onlar da həmin laynerləri müxtəlif yollarla istifadə edirlər. "Queen Mary" və "Queen Elizabeth 2"də belə olub, onlar indi müvafiq olaraq Kaliforniya və Dubayda üzən otellərdir.

Bəzən kruiz laynerləri adını dəyişir və satışdan sonra üzməyə davam edir. Məsələn, "Margaritaville at Sea" kruiz şirkətinin yeni gəmisi olan "Beachcomber" layneri əslində "Costa Cruises"dan alınmışdı.

Eyni zamanda, məsələn, bir vaxtlar "Royal Caribbean"in ən böyük gəmilərindən biri olan "Majesty of the Seas" heç vaxt yeni həyat tapmayıb. 2020-ci ildə o, yunan bərə şirkəti "Seajets"ə satılıb. İllərlə tərk edilmiş gəmi yanacaq doldurma məntəqəsində dayanıb və heç vaxt yeni səfərə çıxmayıb.

Əgər gəminin yenidən istifadəsi üçün tələbat yoxdursa, onu sökməyə göndərə bilərlər. Bu qərar müxtəlif səbəblərlə, o cümlədən təmirdə həddindən artıq yüksək xərclər səbəbi ilə qəbul edilir. Bu tale son illərdə "Carnival-in Ecstasy", "Fantasy" və "Sensation" daxil olmaqla bir neçə kruiz laynerinə üz verib.

Kruiz gəmilərinin utilizasiyası və sökülməsi

Kruiz şirkəti gəmilərin sökülməsindən mənfəət əldə edə bilər. Bu pul gəminin qurğusundan qalan metalın və əvvəllər başqa məqsədlər üçün xidmətdən çıxarılmamış digər komponentlərin satışından əldə olunur. Gəminin böyük hissəsi təkrar emal olunur və onun bəzi hissələri yeni kruiz gəmisində yenidən istifadə edilə bilər.

Kruiz laynerinin tikintisi kimi, onun sökülməsi də asan iş deyil. Bu proses dünyanın müxtəlif yerlərində, o cümlədən Banqladeş, Hindistan və Böyük Britaniyada həyata keçirilir.

Eyni zamanda, gəmi sökən müəssisələr səmərəli işləyə bilsələr də və tez-tez yaxşı təchiz olunsalar da, bu iş ekipajlar üçün çox təhlükəli hesab olunur. Bu, həmçinin, bordakı zəhərli materiallar lazımi şəkildə işlənmədikdə ətraf mühit üçün də təhlükəlidir.

Samir