Ukrayna Avropa tərəfdaşlarının pulu ilə ABŞ silahlarının alınmasına imkan verən PURL proqramı vasitəsilə ABŞ silahlarının alınması üçün əlavə 1 milyard avro almağa çalışır.
HİT.az xəbər verir ki, bu barədə Ukraynanın NATO-dakı missiyasının rəhbəri Alena Getmançuk "Bloomberg"ə verdiyi şərhdə bildirib.
"Ukraynanın PURL vasitəsilə fasiləsiz avadanlıq ala bilməsi üçün müttəfiqlərdən yeni töhfələrə görə son dərəcə minnətdar olardıq", deyə o vurğulayıb.
Onun sözlərinə görə, bu, Rusiyanın artan hava hücumları və işğalçı qüvvələrin qış hücumu fonunda olduqca vacibdir.
Niderland artıq Amerika hava hücumundan müdafiə sistemləri və F-16-ların alınması üçün 250 milyon avro ayrıldığını elan etsə də, əksər Avropa ölkələri öhdəlik götürməyə tələsmir. Səbəb Donald Tramp administrasiyasının Kiyevə maliyyə yardımını dayandırmaq qərarı və Vaşinqtonun qeyri-müəyyən sülh təşəbbüsləridir.
İlkin "28 maddəlik plan" xüsusilə gərgin idi və Avropada bir çoxlarının fikrincə, bu, Moskva üçün daha sərfəli idi. Yalnız Cenevrədəki düzəlişlərdən sonra sənəd Ukrayna üçün daha məqbul hala gəlib.
Danışıqlar Floridada davam edib və ABŞ dövlət katibi Marko Rubio onları məhsuldar adlandırsa da, hələlik heç bir irəliləyiş yoxdur. ABŞ-ın xüsusi nümayəndəsi Stiv Uitkoff bu həftə danışıqların yeni mərhələsi üçün Moskvaya yola düşür.
Getmançuk vurğulayıb ki, hər hansı bir sülh müzakirəsi Ukraynaya dəstəyin azaldılması üçün bir siqnal kimi qəbul edilməməlidir.
Ukrayna Avropanı dərhal təzminat krediti ilə bağlı razılığa gəlməyə çağırır, çünki dondurulmuş Rusiya aktivlərinin istifadəsi ilə bağlı qərar hələ verilməyib. Bu məsələ 18 dekabrda keçiriləcək Aİ sammitində müzakirə olunacaq.
Getmançuk bildirib ki, PURL proqramının effektivliyi sübut olunub:
* Yaydan bəri Ukraynaya verilən bütün Patriot komplekslərinin 75%-i məhz PURL vasitəsilə maliyyələşdirilib;
* Digər hava hücumundan müdafiə sistemlərinin 90%-i də müttəfiqlər tərəfindən bu proqram vasitəsilə təmin edilib.
Avadanlıqların siyahısına həmçinin Ukraynaya Rusiya dronlarını daha uzaq məsafədən vurmağa imkan verən uzun mənzilli artilleriya sursatları da daxildir.
Samir
