ABŞ prezidenti Donald Tramp böyük güclər, yəni Çin və Rusiya ilə rəqabətə son qoymaq üçün fəal şəkildə çalışır.

HİT.az xəbər verir ki, bunu "Axios" qəzeti yazıb.

Jurnalistlərin fikrincə, Tramp ilk müddətində Rusiya və Çinlə rəqabət dövrünü başlatmışdı, lakin indi o, buna son qoymaq və iki ölkə ilə razılaşmalar bağlamaq niyyətindədir.

ABŞ rəsmisi "Axios"a bildirib ki, ABŞ administrasiyası ABŞ-ın milli və iqtisadi təhlükəsizliyinə xələl gətirmədən Çinlə qarşılıqlı faydalı ticarət əlaqələri qurmağa sadiqdir.

Nəşr vurğulayıb ki, ABŞ Rusiya ilə münasibətlərində də qarşıdurmadan kompromisə, razılaşma əldə etməyə və ərazi güzəştlərinə razılıq verməyə hazır olmağa doğru irəliləyir. "Axios" yazır ki, bunu Trampın Ukraynaya bütün Donbası Rusiyaya təhvil vermək üçün təzyiqi də sübut edir.

Jurnalistlər qeyd edirlər ki, Ukrayna münaqişəsi bitdikdən sonra ABŞ administrasiyası Rusiya ilə enerji, təbii sərvətlər, infrastruktur, süni intellekt, məlumat mərkəzləri, nadir torpaq elementləri və digər sahələrdə uzunmüddətli iqtisadi əməkdaşlıq müqaviləsi bağlamaq niyyətindədir.

"Axios" həmçinin əlavə edir ki, ABŞ-ın yeni Milli Təhlükəsizlik Strategiyası Rusiyaya qarşı Aİ-yə nisbətən "daha az düşmənçilik xarakteri daşıyır". ABŞ bu sənədi 5 dekabr 2025-ci ildə dərc edib. Orada Ukrayna böhranının həlli və Rusiya ilə münasibətlərin sabitləşdirilməsi Vaşinqtonun prioritetləri arasında yer alıb. Lakin strategiyada Avropa İttifaqı tənqid olunub və bu da avropalı siyasətçilər arasında qəzəbə səbəb olub.

Samir