Ekspertlər 2026-cı ildə turizm vergilərinin artması ilə əlaqədar qiymətlərin yüksələcəyi 5 istiqaməti müəyyən ediblər.
HİT.az "Business Insider"ə istinadən xəbər verir ki, gələn il səyahət etməyi planlayan turistlər bir sıra istiqamətlərdə yeni və ya artırılmış turizm vergilərini nəzərə almalıdırlar.
1. Edinburq, festivalları ilə məşhur şəhər
Edinburq Şotlandiyanın ilk şəhəri olacaq ki, turizm vergisini tətbiq edəcək. 2026-cı il 24 iyuldan etibarən turistlər ilk beş gecə üçün otel yerləşdirmələrinin qiymətinə əlavə 5% ödəyəcəklər. Yerli hakimiyyət bildirir ki, gəlirlər şəhərin mədəni və tarixi mərkəz statusunu qorumağa yönələcək. Hər il milyonlarla turist yay festivallarına — Edinburq Beynəlxalq Festivalı, Festival Fringe və Royal Edinburgh Military Tattoo hərbi şousuna — cəlb olunur. Yeni vergi 2029-cu ilə qədər ildə təxminən 50 milyon funt (təxminən 67 milyon dollar) gəlir gətirəcək.
2. Kiyoto: “Məbədlər şəhəri” gecələri daha baha olacaq
1 martdan etibarən Yaponiyanın Kiyoto şəhərində otellərdə və digər yerləşdirmə yerlərində gecələmə vergisi artırılır. 6 min yenə qədər ucuz yerlər üçün vergi 200 yen səviyyəsində qalacaq. 6–20 min yen qiymət aralığındakı otaqlar üçün vergi iki dəfə artırılaraq 400 yen olacaq. Lüks otellərdə isə 50–100 min yenlik otaqlar üçün vergi 1 mindən 4 min yenə, 100 min yendən baha olan otaqlar üçün isə 10 min yenə qalxacaq. Yerli hakimiyyət hesab edir ki, yenilənmiş vergi ildə təxminən 12,6 milyard yen (təxminən 81 milyon dollar) gəlir gətirəcək.
3. Barselona: beş ulduzlu otellər xeyli bahalaşacaq
Barselona memarlığı və şəhər çimərlikləri ilə məşhurdur. Hazırda beş ulduzlu otellərdə qalmaq və lüks mənzillərdə yerləşmək üçün turistlər 3,50 avro gecəlik regional turizm vergisi ödəyirlər. Kataloniya qaydalarına əsasən, bu vergi bahalı yerlərdə 7 avroya qaldırılacaq. Dəyişikliklər ilkin olaraq 2025-ci ildə qüvvəyə minməli idi, lakin ən azı 2026-cı ilin aprel ayına qədər təxirə salınıb. Bu qərar İspaniyada turistlərə qarşı artan narazılıq və həyat xərclərinin yüksəlməsi fonunda qəbul olunub.
4. Tailand: giriş turizm vergisi
Tailand giriş turizm vergisini tətbiq etməyə hazırlaşır. 2023-cü ildə hökumət hava yolu ilə gələn turistlər üçün 300 bat (təxminən 10 dollar), quru və ya dəniz yolu ilə gələnlər üçün isə 150 bat ödəməyi təsdiqləmişdi. Vergi tətbiqi bir neçə dəfə təxirə salınıb, xüsusilə turizm axınının azalması səbəbindən. Tailand Turizm və İdman Nazirliyinin məlumatına görə, ilin əvvəlindən 21 dekabradək turistlərin sayı keçən ilin eyni dövrü ilə müqayisədə 7,25% azalıb. "EuroNews"un məlumatına görə, verginin tətbiqi 2026-cı ilin ortalarında gözlənilir.
5. Norveç: yerləşdirmə vergisi
2026-cı ildən etibarən Norveçdə qanun qüvvəyə minəcək ki, bələdiyyələr turizm yerləşdirməsinə 3% vergi tətbiq edə biləcək — həm kruiz sərnişinləri, həm də otel gecələmələri üçün.
Vergi bütün ölkə üçün məcburi olmayacaq: şəhərlər və icmalar fərdi olaraq tətbiq üçün müraciət etməlidirlər. Artıq razılaşan yerlər arasında Lofoten adaları və Troms var — şimal işığını izləmək üçün populyar istiqamətlər. Taylanddan fərqli olaraq, Norveç 2025-ci ildə turizm bumu yaşamışdı: yayda təxminən 17,7 milyon gecələmə qeydə alınıb.
"Business Insider" vurğulayır ki, gəlirləri artırmaq, yerli xidmətləri maliyyələşdirmək və ya turistlərin çoxluğunu idarə etmək məqsədilə bir çox ölkə və şəhər turizm vergilərini tətbiq edir və ya artırır. Bu vergilər giriş haqqı və ya yerləşdirmə qiymətinə əlavə edilə bilər və o, getdikcə overturizmlə mübarizə və populyar yerlərə yükü kompensasiya etmək vasitəsi kimi istifadə olunur.
Samir
