İrlandiyanın qərbində, Dinql şəhəri yaxınlığında yerləşən mənzərəli və yaşayış olmayan Qreyt-Blasket adası (Great Blasket Island) yerli kafe və qonaq evlərinin idarə olunması üçün iki müvəqqəti əməkdaş axtardığını elan edib.
HİT.az xəbər verir ki, “Mirror” nəşrinin yazdığına görə, baxıcılar üç istirahət kotecinə nəzarət etmək, onların təmizlənməsi və rənglənməsi, qonaqların qarşılanması və onlara xidmət göstərilməsi, çay və qəhvə hazırlanması, eləcə də obyektlərin fasiləsiz fəaliyyətinin təmin edilməsinə cavabdeh olacaqlar.
“Elanı diqqətlə oxuyun: biz zəhmətkeş, məsuliyyətli, etibarlı, güclü ünsiyyət bacarıqlarına və təşəbbüskarlığa malik insan axtarırıq. Bu iş məzuniyyət üçün nəzərdə tutulmayıb. Mövsüm çox gərgin ola bilər və günün böyük hissəsini ayaq üstə keçirməli olacaqsınız”, deyə vakansiya təsvirində qeyd olunur.
Vakansiya elanında adada bəzən “Çox izdihamlı” vəziyyətin yarana biləcəyi vurğulanır. Bu səbəbdən baxıcıları “intensiv” iş rejimi gözləyir və onlardan “Qreyt-Blasket” adasında resursların “çox məhdud” olduğunu anlamaları tələb olunur.
Namizədlər adaya mart ayının son həftəsində gəlməyi planlaşdırmalıdırlar. İş mövsümü hava şəraitindən asılı olaraq 1 aprel tarixindən oktyabrın ortalarına qədər davam edəcək.
Potensial əməkdaşlara xəbərdarlıq edilir ki, istirahət günləri hava şəraitindən asılı olacaq. Məsələn, bir neçə gün davam edən pis hava reyslərin ləğv olunmasına səbəb ola bilər, dörd həftəlik günəşli hava isə yenidən gərgin iş dövrü deməkdir.
Bu işin üstünlükləri də var. Maaşdan əlavə, əməkdaşlara qida və yaşayış yeri təmin edilir. Lakin spirtli içkilər və tualet ləvazimatlarının gündəlik alışlara daxil olmadığı bildirilir.
Müraciətləri rəsmi internet saytı vasitəsilə təqdim etmək mümkündür.
Qreyt-Blasket adası vəhşi təbiət və sivilizasiyadan uzaq həyat axtaranlar üçün əsl cənnət sayılır. Adada daimi yaşayış yoxdur.
“Xüsusi mühafizə olunan təbiət zonası” statusuna malik ada təxminən 6,5 kilometr uzunluğunda, 445 hektardan çox ərazini əhatə edir. 1953-cü ildən bəri boş qalan Qreyt-Blasket vaxtilə ən təcrid olunmuş irlanddilli bölgələrdən biri olub.
Adanın əsas görməli yerlərindən biri zəngin faunasıdır. Burada bir neçə növ delfin, nəhəng köpəkbalığı, boz suitilər və balinalara rast gəlinir. Ada həmçinin quş müxtəlifliyi ilə seçilir – burada sümsük quşları, puffinlər, Arktika ternləri, gillemotlar və karabataklar yaşayır.
Qreyt-Blasket adasındakı kotec evlərində yaz–yay mövsümündə gecəlik qiymətlər 264 avrodan başlayır, payıza doğru isə 220 avroya qədər enir. Turistlər üçün məşhur kirayə saytlarının məlumatına görə, bron yalnız minimum iki gecəlik mümkündür.
Bu məbləğə iki nəfərlik yerləşmə imkanı olan kotec evinin tam icarəsi daxildir. Evin daxilində 17 kvadratmetrlik yaşayış sahəsi, hamam otağı, tam təchiz olunmuş mətbəx, qonaq otağı və kamin mövcuddur. Pəncərələrdən dağ və dəniz mənzərələrinin açıldığı bildirilir.
Hazırda kotec qəsəbəsinin fəaliyyət göstərdiyi demək olar ki, bütün günlər üçün boş evlər mövcuddur. İstisna olaraq iyun ayı və digər aylarda bəzi ayrı-ayrı tarixlər doludur.
Samir
