Çörək bir çox insanın gündəlik qida rasionunun əsas məhsullarından biridir. O, sağlam qidalanmanın bir hissəsi ola bilsə də, bəzi çörək növləri digərləri ilə müqayisədə ümumi sağlamlıq vəziyyətinə, xüsusilə də arterial təzyiqə daha müsbət təsir göstərir.

Hit.az xəbər verir ki, "Health" nəşri diyetoloqlarla söhbət edərək təzyiq üçün ən faydalı çörək növünü müəyyənləşdirib.

Cücərdilmiş tam taxıldan hazırlanmış çörək təzyiq üçün ən yaxşı seçim hesab olunur. Bu, onun yüksək qida dəyəri, o cümlədən arterial təzyiqin tənzimlənməsi üçün vacib olan lif və minerallarla zəngin olması ilə əlaqələndirilir.

“Taxılların tərkibində olan lif ümumilikdə arterial təzyiqin azalmasına kömək edir. Bu, ehtimal ki, qan damarlarının funksiyasının yaxşılaşması, iştahanın tənzimlənməsi və çəkinin nəzarətdə saxlanması ilə bağlıdır”, diyetoloq Aleksandr Lerits bildirib.

Araşdırmalar göstərir ki, lif istehlakının artırılması arterial təzyiqi aşağı salmağın effektiv yollarından biridir. Tədqiqatlara əsasən, yüksək qan təzyiqi olan qadınlar gündə azı 28 qram, kişilər isə 38 qram lif qəbul etməlidir.

“Adətən bir dilim çörəkdə ən azı 3–5 qram lif olur”,  diyetoloq Vikki Klimantiris qeyd edib.

Bundan əlavə, cücərdilmiş tam taxıldan hazırlanan çörək rafinə olunmuş ağ undan bişirilən çörəklə müqayisədə təzyiqi tənzimləyən maqnezium kimi minerallarla daha zəngindir. Belə çörəklərin tərkibində natrium da çox vaxt ağ çörəyə nisbətən xeyli az olur.

“Cücərdilmiş tam taxıldan hazırlanan çörəyin qlisemik indeksi ağ çörəkdən aşağıdır. Bu isə o deməkdir ki, yeməkdən sonra qanda şəkərin səviyyəsi kəskin şəkildə yüksəlmir”, diyetoloq Raşel Adjemera deyib.

Cücərdilmiş taxıl çörəyinin qida dəyəri:

kalori – 80;
karbohidratlar – 15 qram;
lif – 3–5 qram;
zülal – 4 qram;
yağ – 0,5 qram;
natrium – 75 milliqram;
maqnezium – 26 milliqram.

Cücərdilmiş tam taxıl çörəyi ilk yeri tutsa da, diyetoloqlar mayalı çörəyi də tövsiyə edirlər.

“Mayalı çörəyin hazırlanması zamanı baş verən fermentasiya prosesində qan damarlarını rahatladaraq arterial təzyiqi aşağı sala bilən peptidlər əmələ gəlir”, deyə Vikki Klimantiris izah edib.

Samir