Nəhəng heyvanlar adətən Yer üzündə dinozavrların yaşadığı dövrlərlə əlaqələndirilir və həmin canlılar təsir edici ölçülərə malik olublar.

Hit.az xəbər verir ki, bu barədə "IFLScience" yazır.

Qeyd olunur ki, Palaeophis colossaeus Yer üzündə indiyədək yaşamış ən böyük dəniz ilanı hesab olunur. Bu növ yalnız nisbətən çox iri onurğa sümükləri əsasında tanınır və həmin tapıntılar onun uzunluğunun təxminən 8,1 metrdən 12,3 metrədək ola biləcəyini göstərir.

“Məqalədə təsvir edilən Palaeophis colossaeus çox böyük bir ilandır və onun onurğa sümükləri bu gün mövcud olan istənilən məlum növdən daha iridir”, deyə tədqiqatın müəllifləri bildirirlər.

Hesab olunur ki, bu nəhəng ilan eosen dövründə qədim dənizlərdə yaşayıb. Onun ölçüləri və ehtimal edilən su həyat tərzi göstərir ki, üzərək ov etdiyi dənizlər müasir tropik okeanlarla müqayisədə xeyli daha isti olub. Xüsusilə, ilanın müasir Sahara səhrasının bir hissəsini əhatə edən Transsaxara dəniz yolu ərazisində, isti və dayaz dəniz mühitində yaşadığı ehtimal edilir.

Maraqlıdır ki, bu canlının ölçüləri onun yüksək səviyyəli dəniz yırtıcısı olduğunu da göstərir. Lakin yalnız onurğa sümüklərinə əsaslanaraq onun dəqiq nə ilə qidalandığını söyləmək çətindir. Alimlər yazırlar:

“Bununla belə, əgər onun kəllə quruluşu çox hərəkətli idisə, istehlak etdiyi ovun ölçüsü demək olar ki, istənilən məlum müasir növü udmağa imkan verəcək qədər böyük ola bilərdi”.

Bu ovlar arasında akulalar kimi iri balıqlar və ya dirozavrlar kimi tanınan, timsaha bənzər reptiliyalar da ola bilərdi.

Qeyd edək ki, uzunluğu təxminən 13 metrə çatan və dünyanın ən böyük ilanı hesab edilən titanoboa da nəsli kəsilmiş canlıdır. Bu gün yaşayan dəniz ilanları arasında ən uzunu sarı dəniz ilanıdır (Hydrophis spiralis) və onun qeydə alınmış maksimal uzunluğu təxminən 3 metrdir.

Samir