Dünyada hər hansı bir quru parçasına ən uzaq nöqtə olaraq bilinən Point Nemo illərdir göydən düşən nəhəng metal qalıqlarına ev sahibliyi edir. Bu ıssız bölgəyə çatan nadir kəşfiyyatçılar, ev boyda dalğalarla mübarizə apararkən okeanın misilsiz mavisinə şahid olublar.

HİT.az xəbər verir ki, Point Nemo Cənubi Sakit Okeanda yerləşir və quruya ən uzaq nöqtə hesab olunur. Ən yaxın quru parçası tam 2.700 kilometr uzaqdadır. Bu qədər uzaq bir mövqeyə sahib olduğu üçün, bəzən ətrafdakı yeganə insanlar, yuxarıdan keçən kosmik stansiyadakı astronavtlar olur. Beynəlxalq kosmik agentliklərin buranı “kosmik gəmi məzarlığı” kimi seçməsi təsadüfi deyil: düşən hissələrin heç kimə zərər verməyəcəyi ən təhlükəsiz yer burasıdır.

2024-cü ildə bu bölgəyə yola çıxan macəraçı Kris Braun və oğlu Mika, səfərin nə qədər qorxulu olduğunu öz gözləri ilə görüb. Mika Braun nəhəng dalğalarla necə mübarizə apardıqlarını təsvir edir: Ev boyda dalğaların arasında hər 13 saniyədə bir 8 metr aşağı-yuxarı hərəkət etmək kimi bir hiss yaşanırdı. Günlərlə davam edən dəniz tutması və çətin şərtlərin sonunda çatdıqları nöqtə, insana təbiət qarşısında nə qədər müdafiəsiz olduğunu bir daha xatırladır.

Point Nemoda suyun dərinliyi təxminən 4 kilometrdir. Bu, kosmik tullantılar üçün ideal yataq olsa da, üzmək istəyənlər üçün bir az qorxulu görünür. Kris Braun deyir ki, burada gördüyü mənzərə gözlədiyindən çox fərqli olub: Su qaranlıq yox, göz qamaşdıran və göyümtül mavi rəngdədir. Okeanın bu ən dərin və ən tənha nöqtəsində, suyun altındakı sonsuzluq hissi insanı valeh edən bir gözəllik yaradır.

Beynəlxalq Kosmik Stansiya (BKS) qarşıdakı illərdə bu kimsəsiz mavi sularla vidalaşmaq üçün atmosferə yenidən daxil olacaq. Dünyanın qalan hissəsindən tamamilə təcrid olunmuş bu nəhəng su hövzəsi bəşəriyyətin ən əhəmiyyətli texnoloji miraslarından birinə ev sahibliyi etməyə hazırlaşır. 2031-ci ilə qədər səmadan uçan fraqmentlər qısa müddətə Nemo nöqtəsinin sükutunu pozacaq və veteran stansiyası bu dərin mavilikdə öz yerini tutacaq.

Samir