Əvvəllər Rusiya Ukrayna ilə danışıqlara daha çox prosesi ləngitmək məqsədilə gedirdisə, indi Moskvada mövqelərin dəyişməsinə səbəb ola biləcək ciddi problemlər yaranır. 

HİT.az xəbər verir ki, bu fikri “Radio NV”nin efirində istefada olan general-leytenant İqor Romanenko səsləndirib.

“Biz görürük ki, dekabr–yanvar ayları onlar üçün o qədər də uğurlu keçmir. Cəmi təxminən 250 kvadrat kilometr ərazi ələ keçirilib, itkilər isə 30–35 min nəfər civarındadır. Bu, təxminən ordularına aylıq cəlb etdikləri şəxslərin sayına bərabərdir. 2025-ci ildə isə elə aylar olub ki, 40–50 min, bəzən isə 60 minə qədər şəxsi heyət cəlb edirdilər. Məhz bu fərq hesabına ehtiyat qüvvələr formalaşdırılırdı. Planlaşdırılan 14 diviziyadan cəmi 7-ni yarada biliblər və indi onları Pokrovsk, Qulyaypole və Kupyansk istiqamətlərində istifadə etməyə məcbur qalırlar”, deyə Romanenko bildirib.

Onun sözlərinə görə, bu amil artıq Rusiyaya ciddi təzyiq göstərir. Bundan əlavə, Moskvaya həm Qərbin sanksiyaları, həm də Ukraynanın Rusiya ərazisinə endirdiyi uzaqmənzilli zərbələr təsir edir.

“Ötən ilin sonu yalnız mülki iqtisadiyyatda vəziyyətin pisləşməsi ilə yadda qalmadı. Hərbi-sənaye kompleksinə daxil olan müəssisələrdə də geriləmə başladı. Bu, müharibənin dörd ili ərzində ilk dəfə baş verir. Yəni belə tendensiyalar mövcuddur”, deyə Romanenko əlavə edib.

Ekspertin sözlərinə görə, problemlər Rusiyanın Ukraynaya qarşı hücumlarının miqyasında da özünü göstərir. O qeyd edib ki, əvvəllər Rusiya kütləvi hücumlar zamanı 500–700 hava hücum vasitəsindən istifadə edirdisə, indi bu rəqəm təxminən 250-yə düşüb.

“Bütün bunlar həm hava hücum vasitələrində, həm də hava hücumundan müdafiə sistemlərində çatışmazlığın yarandığını göstərir. Onlarda ilk növbədə zenit raketləri ilə bağlı problemlər ortaya çıxıb. İkinci növbədə isə radiolokasiya stansiyaları ilə bağlı çətinliklər var. Bu tendensiyalar onu göstərir ki, bu il düşmən üçün asan olmayacaq. Məhz buna görə də danışıqlar prosesində döyüş əməliyyatlarının dayandırılması və atəşkəsə texniki hazırlıq məsələləri müzakirə olunur”, deyə Romanenko izah edib.

Samir