Ukrayna çərşənbə günündən bazar gününə qədər olan müddətdə Rusiya ordusundan 201 kvadrat kilometr ərazini geri alıb. Ukrayna Silahlı Qüvvələri bu qədər ərazini 2023-cü ilin iyun ayında həyata keçirilmiş əks-hücumdan bəri belə qısa müddətdə azad etməmişdi.

HİT.az xəbər verir ki, bu nəticə ABŞ-da fəaliyyət göstərən Müharibənin Öyrənilməsi İnstitutunun (ISW) dərc etdiyi məlumatların təhlilindən irəli gəlir. 

Geri qaytarılan ərazi demək olar ki, Rusiyanın dekabr ayı ərzində ələ keçirdiyi ümumi sahəyə (244 kvadrat kilometr) bərabərdir.

ISW-in bəyanatında bildirilir ki, Ukraynanın əks-hücumları böyük ehtimal Rusiya silahlı qüvvələrinin "Starlink" peyk sistemi ilə əlaqəsinin məhdudlaşdırılmasından istifadə edir. Rus hərbi bloqqerlərinin sözlərinə görə, bu məhdudiyyət rabitə və idarəetməni zəiflədib.

Həqiqətən də, rusiyalı hərbi müşahidəçilər fevralın 5-də fasilələr qeydə alıblar. Bu, İlon Maskın Kreml tərəfindən bu texnologiyanın istifadəsinin dayandırılmasına yönəlmiş “tədbirlər” barədə açıqlamasından sonra baş verib. Ukrayna tərəfinin məlumatına görə, Rusiya pilotsuz uçuş aparatları "Starlink" vasitəsilə radioelektron mübarizə sistemlərini keçərək hədəfləri dəqiq vura bilirdi.

ISW-in məlumatına əsasən, ötən həftə "Starlink"dən istifadə olmadan Rusiya qoşunları cəbhədə yalnız fevralın 9-da ərazi irəliləyişi əldə edə bilib. Digər günlərdə isə Kiyev qüvvələri irəliləyib.

Ukraynanın əks-hücumları əsasən Zaporojye şəhərindən təxminən 80 kilometr şərqdə yerləşən ərazidə cəmlənib. Rusiya qüvvələri 2025-ci ilin yayından etibarən həmin istiqamətdə əhəmiyyətli irəliləyiş əldə etmişdi.

Fevralın ortalarına olan məlumata görə, Rusiya Ukrayna ərazisinin tam və ya qismən 19,5 faizinə nəzarət edir. Bir il əvvəl bu göstərici 18,6 faiz idi. Təxminən 7 faiz — Krım və Donbasın bir hissəsi — 2022-ci ilin fevralında başlayan genişmiqyaslı işğaldan əvvəl də Rusiyanın nəzarəti altında idi.

Samir