2025-ci ildə İsveç Ukraynaya hərbi yardımın həcminə görə dünyada üçüncü yeri tutub – həm ümumi yardım həcmi, həm də milli ÜDM-in payı baxımından. 

HİT.az xəbər verir ki, "Defence Blog"un yazdığına görə, bu məlumat İsveçin Ukraynadakı səfirliyinin, Kiel Dünya İqtisadiyyatı İnstitutunun hesabatına əsaslanır.

Avropa ölkələri birlikdə 2025-ci ildə Ukraynaya təxminən 21,5 milyard dollar dəyərində hərbi yardım göstərib ki, bu da 2024-cü ilə nisbətən təxminən 1,5 milyard dollar çoxdur.

Avropa donor ölkələri arasında Almaniya ən böyük hərbi yardım təminatçısı olaraq 2025-ci ildə təxminən 10,6 milyard dollar (9 milyard avro) yardım ayırıb. Böyük Britaniya isə onu 6,4 milyard dollar (5,4 milyard avro) ilə izləyib. İsveç isə təxminən 4,4 milyard dollar (3,7 milyard avro) hərbi yardım göstərərək üçüncü sırada qərarlaşıb.

Eyni zamanda, Şimal ölkələri – Norveç, Danimarka və İsveç – Ukraynaya hərbi yardım üçün ÜDM-lərinin 0,6%-dən çoxunu ayıraraq nisbətən ən səxavətli donorlar sırasına daxil olublar.

Avropa tərəfdaşlarından verilən hərbi yardıma hava hücumundan müdafiə sistemləri, zirehli texnika, artilleriya mərmiləri və Ukraynanın kritik infrastrukturunu və yaşayış məntəqələrini raket və pilotsuz hücumlardan qorumaq qabiliyyətini artırmaq məqsədilə təlim proqramları daxil olub.

Samir