ABŞ-ın Rusiya neftinin alışını azaltmaq üçün təzyiqi fonunda Hindistan Səudiyyə Ərəbistanından son altı ildə ən böyük həcmdə neft idxal etməyə hazırlaşır.

HİT.az xəbər verir ki, bu barədə "Bloomberg" yazıb.

Fransız şirkəti "Kpler"in baş analitiki Sumita Ritoliya proqnozlaşdırır ki, tədarük gündə 1–1,1 milyon barrelə çatacaq – bu, 2019-cu ilin noyabrından bəri ən yüksək səviyyədir. "Kpler" məlumatına görə, bu, ümumilikdə Rusiyadan gələn tədarük həcminə uyğun gəlir.

Eyni zamanda jurnalistlər bildirirlər ki, fevral ayında Rusiya hələ də Hindistana neftin ən böyük tədarükçüsü ola bilər. Nəşr xatırladır ki, "Kpler" analitikləri Rusiyanın Nyu-Dehliyə tədarükünü bu il gündə 1,2 milyon barrel olaraq proqnozlaşdırmışdılar, lakin gözlənilir ki, tədarük həcmləri daha da az olacaq.

"Kpler"in məlumatına görə, mart ayında Rusiyadan idxalın daha da azalacağı və gündə 800 000–1 milyon barrel olacağı gözlənilir.

"Avropa İttifaqının tətbiq etdiyi sanksiyalardan sonra tamamilə Rusiya neftindən asılı olan "Nayara Energy Ltd."ə məxsus neft emalı zavodunda aprel və may aylarında texniki xidmət işlərinin həyata keçirilməsi həcmləri daha da azaldacaq", deyə jurnalistlər əlavə edirlər.

Nəşr vurğulayır ki, Hindistanda bazar payını itirmək Rusiyanın əsas neft satış bazarını itirməsi deməkdir.

Samir