Braziliya tarixinin ən böyük ekoloji fəlakətlərindən biri kimi qeyd olunan Mariana bəndi qəzasının illər keçməsinə baxmayaraq, ətraf mühitdə yaratdığı ziyan hələ də davam edir. 

HİT.az xəbər verir ki, Doce çayı hövzəsində baş verən bu fəlakət yalnız su ehtiyatlarını və torpaq quruluşunu pozmaqla kifayətlənməyib: bölgədə yetişdirilən kənd təsərrüfatı məhsulları da ciddi sağlamlıq təhlükəsinə çevrilib. Son elmi araşdırmalar göstərir ki, bölgədə yetişdirilən bananlarda yüksək səviyyədə qurşun aşkar edilib və bu xüsusilə uşaqlar üçün ciddi risk yaradır.

2015-ci ildə baş verən və milyonlarla kubmetr mədən tullantısının çaya qarışdığı qəza bölgədəki ekosistemi geri dönməz şəkildə dəyişdirib. Ağır metallarla çirklənmiş palçıq çay boyunca yayılaraq kənd təsərrüfatı torpaqlarının dərinliklərinə işləyib.

Tədqiqatçılar bu çirklənmənin izini sürərkən bölgənin əsas məşğuliyyət sahələrindən biri olan banan istehsalına diqqət yetiriblər. Toplanan məlumatlar göstərir ki, torpaqdakı qurşun bitkilər tərəfindən mənimsənilərək meyvəyə keçir. Bu vəziyyət yalnız yerli əhali üçün deyil, həm də bu məhsulları istehlak edən geniş kütlə üçün dolayı yolla zəhərlənmə riskini artırır.

Bananlardakı qurşun yığılması uşaqlar üçün böyüklərlə müqayisədə daha ciddi təhlükə yaradır. Mütəxəssislər bildirir ki, qurşun orqanizmdə yığılıb sinir sisteminə zərər verə bilər və inkişaf çağındakı uşaqlarda bilişsel geriləməyə səbəb ola bilər. Təhlükəsiz limitlərin üzərində olan bu ağır metal miqdarı, bölgədəki qidalanma vərdişləri və qida təhlükəsizliyi protokollarının yenidən gözdən keçirilməsini zəruri edir.

Təbii hadisələrin və insan fəaliyyətinin yaratdığı fəlakətlərin gələcək nəsillərin sağlamlığı hesabına ödənilməsi olduqca düşündürücüdür.

Samir