Avropa Yenidənqurma və İnkişaf Bankı (EBRD) proqnozlaşdırır ki, Ukrayna iqtisadiyyatı bu il 2,5% artacaq, gələn il isə 4% artım gözlənilir. 

HİT.az xəbər verir ki, bununla yanaşı, bankın əvvəlki proqnozu xeyli yüksək idi – 2026-cı ildə ÜDM-in 5% artması nəzərdə tutulmuşdu.

“Ukrayna müharibəyə baxmayaraq makroiqtisadi sabitliyini qoruyur. İl başında yavaş olan real ÜDM artımı 2025-ci ilin sonuna doğru sürətləndi və ilin yekunu üzrə 2% göstərici əldə olundu", deyə sənəddə qeyd edilir.

Proqnozun pisləşməsi əvvəlki hesabatda bu ilin əvvəlində atəşkəsin təmin olunacağı və müharibədən sonrakı bərpa prosesinin faydalarının əldə ediləcəyi nəzərdə tutulduğundan irəli gəlir, bu isə 2026-cı il üçün 5% artımı mümkün edirdi. EBRD bildirir ki, 2025-ci ilin iqtisadi göstəriciləri müharibə zamanı ciddi məhdudiyyətlər nəticəsində formalaşıb.

“Elektrik enerjisi çatışmazlığı, zəif kənd təsərrüfatı istehsalı və daimi əmək qüvvəsi çatışmazlığı artıma mənfi təsir göstərib, eyni zamanda Rusiyanın infrastruktur obyektlərinə yönəlmiş məqsədli hücumları daimi logistika çətinlikləri yaradıb" - hesabatda qeyd olunub.

Ticarət defisiti taxıl ixracının azalması və Avropa İttifaqının müvəqqəti ticarət imtiyazlarının başa çatması səbəbindən artıb. Buna baxmayaraq, bir çox sektor adaptasiya etməyə davam edib ki, bu da firmaların sarsıntılara baxmayaraq effektiv işləmək qabiliyyətini göstərir.

Əsas ssenari üzrə, Rusiya-Ukrayna müharibəsi 2026-cı il boyunca davam edəcəyi halda, real ÜDM-in bu il 2,5% artacağı proqnozlaşdırılır, 2027-ci ildə isə müharibə bitərsə artım 4%-ə çatacaq. Bununla yanaşı, 2026-cı ilin əvvəlində sülh razılaşması proqnozu əhəmiyyətli dərəcədə yaxşılaşdıra bilərdi. Lakin elektrik enerjisi çatışmazlığı, əmək qüvvəsi məhdudiyyətləri və zəif kənd təsərrüfatı istehsalı hələ də əhəmiyyətli qısa müddətli risklər yaradır.

Samir