Almaniyada, Erfurt şəhərinin yaxınlığında arxeoloqlar insan qalıqları olan böyük bir qəbir aşkar ediblər. Araşdırmaçıların fikrincə, bu, XIV əsrdəki Qara Ölüm vebasının qurbanlarının kütləvi məzarı ola bilər. Tapıntının təxminən 700 illik olduğu qeyd olunur.

HİT.az xəbər verir ki, bu barədə "Daily Galaxy" yazıb.

Tarixi mənbələrə görə, 1350-ci ildə veba epidemiyası zamanı Erfurt yaxınlığında təxminən 12 min insan dəfn edilib. Lakin kütləvi məzarların dəqiq yeri uzun müddət naməlum qalıb.

Leypsiq Universitetinin alimləri tarixi mənbələri müasir texnologiyalarla birləşdirərək mümkün məzar yerini müəyyən edə biliblər. Xüsusilə, onlar qazıntısız torpaqdakı anomaliyaları aşkar etməyə imkan verən elektrik müqaviməti xəritələşdirmə metodundan istifadə ediblər.

Tədqiqatın aparıcı müəllifi Maykl Hayn izah edib ki, bu üsul tədqiqatçılara “landşaftı arxiv kimi oxumağa” imkan verir.

"Bu yanaşma gələcəkdə epidemiyalar və ya münaqişələrlə bağlı digər kütləvi məzarları tapmaq və qorumağa da kömək edə bilər", deyə o əlavə edib.

Mümkün məzar yeri orta əsrdəki Noyzes kəndinin yaxınlığında, tarixi yaşayış yerlərinin kənarında yerləşir ki, bu da o dövrün epidemiyalardan ölü dəfn etmə təcrübələrinə uyğundur.

"LeypsiqLab"ın Tarixi Antroposfer Araşdırmalar Bölməsinin direktoru Kristofer Tsilqofer vurğulayıb ki, bu kəşf daha geniş əhəmiyyət daşıyır:
“Bu tapıntı yalnız arxeoloji və tarixi baxımdan əhəmiyyətli deyil. O, cəmiyyətlərin kütləvi ölüm hallarına necə reaksiya verdiyini anlamağa kömək edir və müasir interdisiplinar elm kütləvi məzarların axtarışında necə faydalı ola biləcəyini göstərir".

Alimlər bildirirlər ki, tapıntını tam təsdiqləmək yalnız arxeoloji qazıntılar vasitəsilə mümkündür. Əgər hipoteza təsdiqlənərsə, bu kəşf vebanın yayılmasını və orta əsr cəmiyyətlərinin bu ölümcül pandemiyaya reaksiyasını daha yaxşı anlamağa kömək edə bilər.

Samir