İspaniya NATO ölkələrinin ÜDM-in 5%-nin müdafiəyə ayrılması tələbinə qarşı çıxır. 

HİT.az xəbər verir ki, İspaniya Baş naziri Pedro Sançes bunu elDiario.es-ə verdiyi müsahibədə bildirib.

"Biz həmçinin ÜDM-in 5%-nin müdafiəyə ayrılmasına qəti şəkildə qarşıyıq. Niyə? Çünki bu, Avropa müdafiə sənayesini stimullaşdırmayacaq və ya gücləndirməyəcək, əksinə, bizi Amerika sənayesindən daha çox asılı edəcək", deyə o qeyd edib.

Eyni zamanda, Sançes Avropanın güclü transatlantik münasibətlərə ehtiyacı olduğunu və onların gücləndirilməsinin Avropada iqtisadi artımın, təhlükəsizliyin və ortaq müdafiənin artırılmasını tələb etdiyini vurğulayıb. İspaniya Baş naziri bu vəziyyəti "paradoksal" adlandırıb.

Mart ayında ABŞ Prezidenti Donald Tramp Vaşinqtonun İspaniya ilə ticarət əlaqələrini kəsmək niyyətində olduğunu açıqlayıb. Çünki Madrid hərbi xərcləri ÜDM-in 5%-nə qədər artırmaqdan imtina edib. Həmçinin 2025-ci ilin oktyabr ayında Tramp İspaniyanın müdafiə xərclərini 5%-ə çatdırmaq istəmədiyinə görə NATO-dan çıxarılmalı olduğunu bildirib.

2025-ci ilin iyun ayında NATO ölkələri müdafiəyə ildə ÜDM-in 5%-ə qədərini xərcləməyə razılaşıblar. Bundan sonra İspaniyanın Baş naziri Pedro Sançes Madridin hədəflərinə çatmaq üçün müdafiəyə ÜDM-in yalnız 2,1%-ni xərcləməli olduğunu bildirib. 2025-ci ilin yanvar ayında isə Sançes İspaniyanın son 10 ildə müdafiə xərclərini 70% artırdığını qeyd edib.

2025-ci ilin yanvar ayında Tramp da NATO ölkələrindən müdafiə xərclərini ÜDM-in 5%-ə qədər artırmağı tələb edəcəyini bildirib.

Samir