Ukrayna istehsalçısı “Fire Point” – “Flamingo” qanadlı raketinin istehsalçısı – Avropa şirkətləri ilə birlikdə yeni hava hücumundan müdafiə sistemi yaratmaq üçün danışıqlar aparır. 

HİT.az xəbər verir ki, bu barədə "Reuters" şirkət nümayəndəsinə istinadən yazır.

Şirkətin məqsədi “Patriot” kimi bahalı sistemlərə daha ucuz alternativ hazırlamaqdır.

“Fire Point”in həmtəsisçisi və baş konstruktoru Denis Ştilerman bildirib ki, məqsəd ballistik raketin tutulma xərclərini 1 milyon dollardan aşağı səviyyəyə endirməkdir:

“Əgər biz bunu 1 milyon dollardan aşağı sala bilsək, bu, hava hücumundan müdafiə sahəsində əsaslı dönüş nöqtəsi olacaq. Biz 2027-ci ilin sonuna qədər ilk ballistik raketi tutmağı planlaşdırırıq”.

Ştilerman həmçinin qeyd edib ki, şirkət Yaxın Şərqdən olan bir konsorsiumun investisiyası üçün hökumət təsdiqini gözləyir. Bu investisiya şirkəti 2,5 milyard dollar dəyərində qiymətləndirir və süni peyklərin aşağı orbitə buraxılması daxil olmaqla yeni layihələrə yol aça bilər.

Onun sözlərinə görə, şirkət iki yeni hipersəs ballistik raketin hazırlanmasını tamamlayır.

Daha kiçik FP-7 raketi təxminən 300 km məsafəyə malik olacaq və yaxın gələcəkdə hərbi istifadəyə verilə bilər. Daha böyük FP-9 raketi isə 850 km məsafəyə 800 kq döyüş başlığı daşıya bilir və sınaq mərhələsinə yaxındır.

“Fire Point” daha əvvəl FPV dronlarının “Flamingo” raketi ölçüsündə hazırlanacağını da bildirmişdi. Həmçinin Ukrayna ballistik raketinin 2026-cı ilin ortalarında hazır olacağı qeyd olunub.

Samir