Vaşinqton Universitetinin rəhbərlik etdiyi alimlər qrupu müəyyən edib ki, müasir başayaqlı molyusklar – "Nautilus" və "Allonautilus" – 500 milyon ildən çox əvvəl yaşamış əcdadları ilə müqayisədə daha böyük dərinliklərdə yaşayır. Üstəlik, gənc fərdlər böyüklərlə müqayisədə iki dəfə daha dərin sularda məskunlaşır. 

HİT.az xəbər verir ki, bu barədə "Earth" yazır.

Tədqiqat zamanı alimlər yeddi ada ərazisində böyüklərin davamlı olaraq suyun səthindən təxminən 200 metr aşağıda yerləşən dar bir zolağa qayıtdığını müşahidə ediblər. Bu qanunauyğunluğa əsaslanaraq, Vaşinqton Universitetindən alim Piter D. Uord bu fərdləri daha erkən yaş mərhələlərinə dair məlumatlarla əlaqələndirib.

Məlum olub ki, eyni canlılar illərlə daha dərin və daha soyuq sularda inkişaf ediblər. Yaşa görə bu bölgü onların həyat dövrünün “itkin” mərhələsinin harada keçdiyini izah etsə də, böyüklərin sonradan necə hərəkət etməsi sualı açıq qalır.

Qeyd olunur ki, gənc dövrdə molyusklar xeyli daha soyuq sularda böyüyür və bu da onların orta inkişaf dərinliyini təxminən 350–400 metrə çatdırır. Bu nəticələr sabit izotoplar – molyusk qabıqlarında temperaturdan asılı olaraq dəyişən kimyəvi “izlər” vasitəsilə əldə edilib.

Alimlər həmçinin müəyyən ediblər ki, bütün böyüklər klassik gündəlik hərəkət modelinə əməl etmir. Yalnız bəzi fərdlər səhər dərinliyə enib axşam yuxarı qalxır, digərləri isə daha nizamsız hərəkət edir.

Maraqlıdır ki, nəsli kəsilmiş 18 "Nautilus" və "Allonautilus" növünün fosil qabıqları onların daha isti sularda böyüdüyünü göstərir. Bu isə onların müasir növlərlə müqayisədə daha dayaz sularda yaşadığını ehtimal etməyə əsas verir, baxmayaraq ki, qədim okeanlar ümumilikdə daha isti olub.

Alimlər hesab edir ki, bu molyuskların sağ qalması daha dərin sulara uyğunlaşma ilə bağlı ola bilər. Daha möhkəm qabıqlar və sərin mühit onların həyat tərzini dəyişib.

Samir