Son illərdə dağlarda gəzinti (hiking) turistlər arasında getdikcə daha populyar olur — həm fiziki dözümlülüyü yoxlamaq, həm də möhtəşəm mənzərələrdən zövq almaq üçün.

HİT.az xəbər verir ki, sığorta şirkəti "InsureandGo" mütəxəssisləri Avropada ən gözəl 5 piyada marşrutu seçiblər.

"Avropada möhtəşəm alp zirvələrindən tutmuş Atlantik okeanı üzərində yüksələn vulkanik dağlara qədər çox unudulmaz marşrutlar var. Bu cığırlar hər addımda yeni mənzərələr açır: alp vadiləri, buzlaqlar, gizli göllər və dağ daxmalarında yerli mətbəx", deyə siyahının müəllifləri bildirir.

1. Mont Blan turu (Fransa, İtaliya, İsveçrə): iyun–sentyabr

Ümumi uzunluğu 170 km olan bu marşrut adətən 7–11 günə tamamlanır və orta çətinlik səviyyəsinə malikdir. İstəyə görə isə hissə-hissə də keçmək mümkündür.

Bu, Avropanın ən məşhur uzun məsafəli piyada marşrutlarından biridir və turistlərə üç ölkənin mədəniyyətini, təbiətini və mətbəxini görmək imkanı verir.

Marşrut boyu alp çəmənlikləri, çiçəkli vadilər və buzlaqlara açılan yüksək dağ keçidləri dəyişir.

2. Piku dağı (Azor adaları, Portuqaliya): may–oktyabr

Təxminən 8 km uzunluğunda olan bu marşrut aktiv vulkana qalxışdır və 7–9 saat çəkir.

Piku Portuqaliyanın ən yüksək dağıdır və Atlantik okeanı üzərində yüksəlir. Yol Casa da Montanha turist mərkəzindən başlayır və lava sahələrindən keçir.

Zirvəyə çatanda Azor adalarının panoramik mənzərəsi və krater görüntüsü açılır.

3. “Beş göl” marşrutu (Zermatt, İsveçrə): iyun–sentyabr

11,3 km uzunluğunda olan bu orta çətinlikli marşrut 3–4 saata keçilir və Matterhorn dağının möhtəşəm mənzərəsini təqdim edir.

Yol beş alp gölünü birləşdirir və hər biri Matterhornun fərqli bucaqdan görünüşünü əks etdirə bilir.

4. Mavi cığır (Çinkve-Terre, İtaliya): mart–may, sentyabr–oktyabr

Təxminən 12 km uzunluğunda olan bu marşrut bir gündə keçilə bilər.

O, İtaliyanın beş məşhur sahil kəndini birləşdirir: Monterosso, Vernazza, Corniglia, Manarola və Riomaggiore.

Cığır qayalı sahil boyunca uzanır və Aralıq dənizinə açılan möhtəşəm mənzərələr təqdim edir.

5. Plitvice gölləri gəzintisi (Xorvatiya): aprel–oktyabr

8–18 km arasında dəyişən bu marşrut asan səviyyəlidir və yarım gün və ya tam gün ərzində keçilə bilər.

UNESCO siyahısına daxil olan Plitvice Milli Parkı firuzəyi göllər və şəlalələr sistemi ilə məşhurdur.

Samir