Rusiya tədricən müvəqqəti işğal etdiyi Krımı əsas logistik mərkəz kimi saxlamaq imkanlarını itirir.
HİT.az xəbər verir ki, bu barədə “Mili̇tarnıy” portalının icmalçısı Vadim Kuşnikov “Espreso” və Slawa.tv-nin birgə layihəsi olan “Ukrayna fokus. Səhər” efirində bildirib.
Onun sözlərinə görə, hazırda regionda Rusiya hərbi logistikası üçün üç əsas istiqamət mövcuddur: işğal olunmuş Krım üzərindən təchizat, Ukraynanın müvəqqəti işğal edilmiş ərazilərində dəmir yolu və avtomobil infrastrukturunun inkişafı, həmçinin dəniz marşrutlarının istifadəsi. Son dövrlərdə Ukrayna kəşfiyyatı Azov dənizi vasitəsilə, o cümlədən Rusiya Taqanroq və işğal altında olan Berdyansk arasında marşrutlarla bağlı logistik aktivliyin artdığını qeydə alır.
Kuşnikov bildirib ki, Rusiya Krım istiqamətindəki zəifliyi anlayaraq alternativ təchizat xətləri qurmağa çalışır. Xüsusilə Krım körpüsünə edilən zərbələrdən sonra bu həssaslıq daha da aydın görünür. O əlavə edib ki, körpü əsas təchizat arteriyasıdır və ona vurulan zərbələrdən sonra işğalçılar itkiləri bərpa etmək üçün bərə daşımalarına güvənməyə çalışıblar, lakin bu imkanlar da məhduddur.
“Krım istiqamətində hərbi logistika imkanlarına gəldikdə, biz paralel marşrutların fəal şəkildə qurulduğunu görürük. İşğal olunmuş Krımın mövqeyinin zəifliyi, xüsusilə əsas əlaqə xətti olan Krım körpüsünə zərbələrdən sonra daha aydın görünür”, deyə ekspert deyib.
Nəticə olaraq, onun qiymətləndirməsinə görə, Rusiya Krımı güclü logistik mərkəz kimi saxlamaq imkanlarını getdikcə itirir və bu istiqamətdə qoşunlarını təmin etmək üçün paralel marşrutların inkişafına daha çox güvənməyə məcbur qalır.
Xatırladaq ki, işğal olunmuş Krımda Rusiya qüvvələri Ukrayna Silahlı Qüvvələrinin mütəmadi zərbə endirdiyi radiolokasiya qurğularını bərpa edir. Lakin Ukrayna Hərbi Dəniz Qüvvələrinin sözçüsü Dmitro Pletençukun sözlərinə görə, Kreml xarici komponentlərdən asılı olduğu üçün bu proses uzunmüddətli ola bilməz.
6 aprel gecəsi isə Ukrayna Müdafiə Kəşfiyyatı (GUR) dron zərbələri ilə Kerç boğazında işğalçı ordunun son dəmir yolu bərəsi olan “Slavyanin”i sıradan çıxarıb.
Andrey Rıjenko hesab edir ki, bu, Rusiya ordusunun logistikası üçün ciddi zərbədir və onların yanacaq, sursat və silah təminatı imkanlarını daha da məhdudlaşdırır.
Samir
