İsveçrənin Nöşatel gölündə sualtı arxeoloqlar Roma dövrünə aid unikal gəmi yükü aşkar ediblər. Tapıntı 20–50-ci illərə aid edilir və 1000-dən çox keramika əşyası ilə yanaşı, legionerlərə məxsus silahları da əhatə edir.
HİT.az xəbər verir ki, bu barədə “Euronews” məlumat yayıb.
Kəşf “Octopus Foundation” təşkilatından Fabian Langenegger və Jülyen Pfayffer tərəfindən edilib. Tədqiqatçılar bildiriblər ki, əvvəlcə gölün dibində gördükləri əşyaları İkinci Dünya müharibəsindən qalmış mina anbarı hesab ediblər.
“Biz ehtiyatla dairəvi obyektlərin olduğu yerə yaxınlaşdıq. Bu, mina ehtiyatı ola bilərdi. Lakin kameranın işığını yandıranda terrakota rəngi göründü. Sınıq qabları görəndə bunun qeyri-adi bir tapıntı olduğunu anladıq”, deyə Pfayffer bildirib.
Qazıntıların aktiv mərhələsi 2025-ci ildə iki həftə, 2026-cı ildə isə təxminən bir ay davam edib. Məlumat bu müddətdə talançıların diqqətini cəlb etməmək üçün gizli saxlanılıb.
Ehtimala görə, gəmi təxminən 6000 nəfərlik Roma legionu üçün İsveçrə istehsalı mətbəx qablarını daşıyırmış.
Keramika ilə yanaşı, suyun altında şəxsi əşyalar və silahlar da tapılıb:
* iki qladius qılıncı (onlardan birinin taxta dəstəyi qorunub);
* döyüş xəncəri;
* kəmər tokası və fibula;
* sikkələr və daha sadə qablarla dolu hörmə səbət.
Arxeoloqların fikrincə, səbət gəmi heyətinə məxsus olub. O, gölün dibindəki çöküntü sayəsində o qədər yaxşı qorunub ki, alimlər hazırda qabların içində qalan qida izlərini belə araşdırırlar.
Hazırda bütün tapıntılar sudan çıxarılıb, çünki onlar balıqçı torları və ya lövbərlər tərəfindən zədələnə bilərdi.
“Bütün artefaktları sudan çıxardıq. Hazırda onlar təmizlənir və quruda restavrasiya olunur. Restavratorlar istehsal möhürləri, qida izləri və hətta qablar arasındakı saman kimi detalları daha dəqiq araşdıra biləcəklər”, deyə tədqiqatçı bildirib.
Gəminin özü hələ tapılmasa da, bu kəşf artıq regionda ən böyük arxeoloji tapıntılardan biri hesab olunur. “Göl xəzinələri” ilə bağlı sərgi və sənədli filmin 2027-ci ildə təqdim olunması planlaşdırılır.
Samir
