USS “Abraham Lincoln” aviadaşıyıcısı hər gün yüz minlərlə litr dəniz suyunu distillə edir. Bu proses təyyarələrin katapultla buraxılması üçün lazım olan buxarın hazırlanması ilə bağlıdır.

HİT.az xəbər verir ki, bu barədə “WioNews” yazıb.

Aviadaşıyıcıda təyyarələrin qalxışı üçün cəmi təxminən 90 metr uzunluğunda katapult sistemlərindən istifadə olunur. Qısa məsafədə reaktiv təyyarələr öz gücləri ilə lazımi sürəti yığa bilmədiyi üçün xüsusi mexaniki sistemlər tətbiq edilir.

Gəmidə klassik buxar katapultları mövcuddur. Bu sistemlər təyyarənin ön təkər şassisinə bağlanır və onu çox yüksək sürətlə irəli çəkir. Nəticədə qırıcı təyyarə cəmi iki saniyə ərzində saatda 165 mil sürətə çatır.

Hər buraxılış üçün təxminən 1350 funt (təxminən 600 kq) yüksək təzyiqli buxar tələb olunur. Bu buxar xüsusi borular vasitəsilə katapult silindrlərinə yönləndirilir.

Katapult sistemləri adi dəniz suyundan istifadə edə bilmir. Dəniz suyu duz və minerallar ehtiva etdiyi üçün yüksək temperaturda borularda çöküntü yaradır və sürətlə korroziyaya səbəb olur. Bu isə avadanlığı sıradan çıxara bilər.

Bunun qarşısını almaq üçün aviadaşıyıcıda dəniz suyunu duzdan və minerallardan təmizləyən xüsusi distillə sistemləri quraşdırılıb. Gəmi gündə təxminən 400 000 qallona (1,5 milyon litr) qədər təmiz su istehsal edə bilir.

Bu distillə edilmiş su tamamilə təmizdir və buxara çevrilərkən zərərli çöküntü buraxmır.

Qeyd olunur ki, bu su yalnız katapult sistemləri üçün deyil, həm də “Nimitz” sinifli aviadaşıyıcını hərəkətə gətirən iki nüvə reaktorunun soyutma və texniki sistemlərində də istifadə olunur.

Samir