Əlcəzair Hərbi Hava Qüvvələrinə məxsus hərbi-nəqliyyat təyyarələrinin son həftələrdə müntəzəm olaraq Avropa İttifaqı ölkələrinin hava məkanından keçərək Rusiyaya uçduğu bildirilir. Bu reyslərin Əlcəzairlə Rusiya arasında hərbi-texniki əməkdaşlıqla əlaqəli ola biləcəyi ehtimal edilir.
HİT.az xəbər verir ki, bu barədə militarnyi.com yazır.
Məlumata görə, oktyabrın 6-da Əlcəzairin “Lockheed C-130 Hercules” hərbi-nəqliyyat təyyarəsi Polşanın hava məkanına daxil olub. Təyyarə Əlcəzairdəki Bufarik aviabazasından havaya qalxıb və Moskvanın Vnukovo hava limanına istiqamətlənib.
Təyyarənin marşrutu İtaliya, Xorvatiya, Macarıstan və Slovakiya üzərindən keçib. Daha sonra Polşanın hava məkanını keçən təyyarə Belarus ərazisi üzərindən Rusiyaya doğru hərəkət edib.
Məlumatlara əsasən, bu, təkcə bir reyslə məhdudlaşmır. Son həftələrdə Əlcəzair və Rusiya arasında “İl-76MD”, “C-130H/H-30 Hercules” və “LM-100J Super Hercules” kimi hərbi-nəqliyyat təyyarələrinin uçuşları qeydə alınıb.
Bu təyyarələrin hərbi yüklərin daşınması ilə yanaşı, Əlcəzairin Rusiyadan aldığı silah sistemlərinə texniki xidmət göstərilməsi və digər hərbi-texniki əməkdaşlıq məqsədləri üçün istifadə oluna biləcəyi qeyd edilir.
Digər tərəfdən, ekspertlər Əlcəzairin Rusiya üçün Afrikadakı logistika fəaliyyətində də mühüm rol oynaya biləcəyini bildirirlər. Marşrutların Moskvanın Mali, Mərkəzi Afrika Respublikası və Liviya kimi ölkələrdəki fəaliyyətləri ilə əlaqəli olduğu ehtimal edilir. Əlcəzairin coğrafi mövqeyi Aralıq dənizi, Sahara və Sahel bölgələri arasında daşımalar üçün əlverişli imkan yaradır.
Əlcəzair Rusiyanın əsas silah alıcılarından biri olaraq qalır. Ölkənin Rusiya istehsalı “Su-57”, “Su-34”, “Su-35” qırıcıları və “S-400” zenit-raket kompleksləri ilə bağlı satınalmalar həyata keçirdiyi bildirilir.
Beləliklə, Əlcəzair-Rusiya hərbi əməkdaşlığı çərçivəsində həyata keçirilən hava daşımaları NATO ölkələrinin, o cümlədən Polşanın hava məkanından keçməklə davam edir. Bu marşrutların Moskvanın həm Əlcəzairlə hərbi əlaqələrində, həm də Afrikadakı logistika imkanlarında əhəmiyyətli rol oynadığı vurğulanır.
Samir
