Seyşel adalarında nəhəng Aldabra tısbağalarının sayı 180 mindən çoxdur. Bu göstərici ölkənin ümumi əhali sayını da üstələyir.

HİT.az xəbər verir ki, yeni araşdırmaya əsasən, Aldabra atolunda (*Aldabrachelys gigantea*) təxminən 183 min yetkin və cavan tısbağa yaşayır. Bu, indiyədək həmin növ üçün qeydə alınmış ən yüksək göstərici hesab olunur. Tədqiqat Seyşel Adaları Fondu və Ekseter Universitetinin alimləri tərəfindən 2018–2022-ci illərdə toplanmış məlumatlar əsasında aparılıb.

Araşdırma göstərib ki, tısbağaların sayı son illərdə nisbətən sabit qalıb. Bu nəticə XIX əsrdə növün üzləşdiyi təhlükə ilə kəskin ziddiyyət təşkil edir. Həmin dövrdə intensiv ovlanma nəticəsində Aldabra tısbağalarının sayı 1000-dən də aşağı düşmüşdü.

Alimlərin fikrincə, populyasiyanın bərpasında Aldabranın qorunan ərazi elan edilməsi mühüm rol oynayıb. Atoll 1981-ci ildə ciddi mühafizə rejiminə götürülüb, 1982-ci ildə isə UNESCO-nun Dünya İrs Siyahısına daxil edilib.

Tədqiqatçılar tısbağaların sayını müəyyənləşdirmək üçün müşahidə olunan və sıx bitki örtüyündə gizləndiyi üçün görünməyən heyvanları da nəzərə alan statistik modeldən istifadə ediblər. Buna görə əvvəlki hesablamaların tısbağaların real sayını aşağı göstərmiş ola biləcəyi bildirilir.

Bununla belə, alimlər xəbərdarlıq edirlər ki, növ üçün təhlükələr tam aradan qalxmayıb. İqlim dəyişikliyi, daha uzunmüddətli quraqlıqlar, dəniz səviyyəsinin yüksəlməsi, eləcə də vəhşi pişik və siçovulların yumurta və balaları məhv etməsi gələcəkdə populyasiyaya təsir göstərə bilər.

Hazırda Aldabra dünyanın nəhəng tısbağalarının vəhşi təbiətdə yaşadığı iki əsas ərazidən biridir. Digər belə ərazi isə Qalapaqos adalarıdır.

Samir