Polşalı Pyotr Qjeş Himalay dağlarına səyahəti zamanı dünyanın ən bahalı göbələklərindən biri hesab edilən Çin kordisepsinə rast gəlib. Ənənəvi Çin təbabətində əsrlərdir istifadə olunan bu nadir göbələk yüksək bazar qiymətinə görə “Tibet qızılı” adlandırılır.

HİT.az xəbər verir ki, bu barədə UNIAN Polşanın RMF FM radiostansiyasına istinadən məlumat yayıb.

Poznan şəhərindəki Regional Dövlət Meşələri İdarəsində çalışan Pyotr Qjeş uzun illərdir göbələklərlə maraqlanır. O, təbiətə olan sevgisinin onu Himalay dağlarına gətirdiyini bildirib.

Söhbət elmi adı Ophiocordyceps sinensis olan Çin kordisepsindən gedir. Bu göbələyin həyat dövrü Tibet, Nepal və Hindistanın şimalındakı yüksək dağlıq ərazilərdə yaşayan bəzi kəpənək növlərinin sürfələri ilə sıx bağlıdır. Göbələk sürfəni yoluxduraraq onun daxilində inkişaf edir.

“Bunlar göbələyin yoluxdurduğu kəpənək sürfələridir. Burada bir qramının qiyməti qızılın qiymətini üstələyir”, – deyə səyyah tapıntısı barədə danışıb.

Niyə “Tibet qızılı” adlandırılır?

Çin kordisepsindən ənənəvi Çin təbabətində əsrlərdir istifadə olunur. Nadirliyi, təbii şəraitdə toplanmasının çətinliyi və yüksək tələbat onun qiymətinin artmasına səbəb olub.

Pyotr Qjeş göbələklər haqqında biliklərini “Göbələk bilicisi” adlı bloqunda, maarifləndirici görüşlərdə və ustad dərslərində bölüşür.

Qeyd edək ki, kordisepsin ənənəvi tibbdə geniş istifadə olunması onun sağlamlığa dair bütün iddia edilən təsirlərinin elmi cəhətdən sübut edildiyi anlamına gəlmir.

Samir