2026-2027-ci illərdə Yeni il ağacının bəzədilməsində fərqli dekor elementləri ön plana çıxır. Ənənəvi ulduz əvəzinə iri bantlar, məxmər lentlər, dekorativ budaq kompozisiyaları və vintage fiqurlarından istifadə etmək tövsiyə olunur. Minimalist üsluba üstünlük verənlər isə ağacın zirvəsini ümumiyyətlə bəzəmədən saxlaya bilərlər.

HİT.az xəbər verir ki, bu barədə Ukraynanın UNIAN nəşri yazıb.

Nəşrin məlumatına görə, bayram ağacının yuxarı hissəsini bəzəmək üçün ən diqqətçəkən seçimlərdən biri iri bantlardır. Xüsusilə məxmər və velür materialından hazırlanan, tünd qırmızı, bordo və ya tünd göy rəngli bantlar ağaca zərif görünüş verə bilər. Dekorun ölçüsünün ağacın həcminə uyğun seçilməsi vacib sayılır.

Digər dəbli seçim məxmər lentlərdir. Onları ağacın zirvəsində sərbəst şəkildə yerləşdirmək, yaxud kiçik dekorativ elementlərlə tamamlamaq mümkündür. Qızılı, gümüşü, bordo və gavalı çalarları bu üslub üçün uyğun rənglər hesab olunur.

Daha təbii görünüş istəyənlər isə küknar budaqları və şam qozalarından hazırlanmış kompozisiyalara üstünlük verə bilərlər. Belə dekoru lentlər və muncuqlarla tamamlamaq mümkündür. Bununla belə, ağacın həddindən artıq bəzəkli görünməməsi üçün digər oyuncaqların yerləşdirilməsində ölçülü davranmaq tövsiyə olunur.

Dizaynerlərin diqqət yetirdiyi başqa bir istiqamət vintage üslubudur. Ağacın zirvəsində çini və ya keramika fiqurları, mələk və göyərçin təsvirləri yerləşdirmək olar. Ağac və parçadan hazırlanan keyfiyyətli dekorlar da alternativ seçimlər sırasındadır.

Məqalədə qeyd olunur ki, minimalizm də aktuallığını qoruyur. Ağac işıqlar və kiçik bantlarla bəzədilibsə, onun zirvəsini boş saxlamaq da zövqlü görünüş yarada bilər. Əsas şərt bütün dekor elementlərinin vahid üslubda seçilməsidir.

Samir