“AFB Bank”ın xalis mənfəəti 2020-ci ilin sonunda 855 min manat və ya 14% azalaraq 5 mln. 388 min manata düşüb.

Bankın hesabatında bildirilir ki, “AFB Bank”ın əsas olan bütün göstəriciləri kəskin şəkildə azalıb. Bankın müştərilərinə verdiyi xalis kreditlər 184 milyon 310 min manat və ya 57,1% azalaraq  137 milyon 966 min manata düşüb. Bu azalma bankın aktivlərinin kəskin şəkildə düşməsinə əsas səbəblərdən biri olub. Belə ki, bankın cəmi aktivləri 2019-cu ilin sonu ilə müqayisədə 293 milyon 280 min manat və ya 51% azalaraq 281 milyon 426 min manata enib.

DEPOZİT PORTFELİ TÜKƏNİR

“AFB Bank”da yerləşdirilən depozitlərin həcmi 1 il ərzində 268 milyon 857 min manat və ya 70,8% azalaraq 110 milyon 568 min manata enib. Nəticədə bankın cəmi öhdəlikləri 1 il ərzində 289 milyon 907 min manat və ya 3 dəfədən çox azalaraq 204 milyon 340 min manata düşüb. Bundan başqa bankın cəmi kapitalı 3 milyon 373 min manat və ya 4,1% azalaraq 77 milyon 86 min manatadək enib.

Bankın faiz gəlirləri 27 milyon 317 min manat, faiz xərcləri 2 milyon 3 min manat olub ki, bu da bankın xalis faiz gəlirini 1 milyon 236 min manat azalaraq 25 milyon 314 min manata enməsinə səbəb olub. “AFB Bank”ın qeyri-faiz gəlirinin 7 milyon 840 min manat, qeyri-faiz xərclərinin isə 18 milyon 470 min manat olması bankın əməliyyat mənfəətinin 2 milyon 301 min manat və ya 13,5% azalmasına səbəb olub. Nəticədə bank 2020-ci ilin sonunda 14 milyon 684 min manatlıq əməliyyat mənfəəti əldə edib.

Bankın məcmu kapitalı 1 il ərzində 3 milyon 346 min manat və ya 4,2% azalaraq 75 milyon 806 min manat olub.

Valyuta.Az