Son zamanlarda avtomobil bazarındakı qiymətlərdə bahalaşma müşahidə olunur. 

İstər ikinci əl avtomobillər, istərsə də yeni maşınlar kifayət qədər baha qiymətə satışa çıxarılır. Bu isə alıcıların narazılığına səbəb olur. Çünki yaxşı bir avtomobil almaq üçün təxminən 15 min manat lazımdır. 

Onu nağd ödəməyə imkanları olmayanlar isə kredit və ya lizinqə girməyə məcbur qalırlar. Bu halda isə avtomobilin ümumi dəyəri daha da bahalaşır. Nəticədə, avtomobil satın alan şəxsdən külli miqdarda vəsait xərcləməyi tələb olunur. 

Bəs ölkəmizdə avtomobil bazarındakı qiymətlər nə üçün bu qədər bahadır? 

Mövzu ilə bağlı nəqliyyat məsələləri üzrə ekspert Aslan Əsədov Hit.az-a açıqlama verib. O, bunun səbəblərindən danışıb:

"Maşınların bahalaşmasının obyektiv və subyektiv səbəbləri var. Əslində, ölkəyə kifayət qədər avtomobil gətirilir. Onların içərisində isə ikinci əl avtomobillər üstünlük təşkil edir. Hazırda Avropa, Yaponiya və ya Koreya istehsalı olan maşınlara təlabat kifayət qədər yüksəkdir. Həmçinin, son zamanlarda Çin avtomobilləri də Azərbaycana daha çox gətirilir". 

Mütəxəssisin sözlərinə görə, avtomobillərin baha olmasının iki əsas səbəbi var:
"Birincisi, gömrük rüsumlarıdır. Belə ki, nəqliyyat vasitələri Azərbaycana gətirilən zaman müəyyən gömrük rüsumları var. Onlar ödənilir və ümumi qiymətin üzərinə gəlir. Digəri isə ikinci əl avtomobillərlə bağlı olan məsələdir. Bu nəqliyyat vasitələrinin ucuzlaşmamasının əsas səbəbləri sırasında ehtiyat hissələrinin baha olması və ya tapılmaması, eləcə də servis və usta xidmətlərinin azlığıdır. Bütün bu faktorlar isə avtomobil qiymətinə təsir edir".

Pərviz