Son zamanlarda Azərbaycanda devalvasiya olacağı barədə iddialar yayılır.

Ötən ilin sonlarından indiyə kimi bənzər fərziyyələrin yayılmasına şahidlik etmişik. Bəzi ekspertlər belə bir ehtimalın olduğunu desə də, bəzi mütəxəssislər bunu inandırıcı hesab etmirlər. 

Bəs əslində vəziyyəti necədir? Həqiqətən hazırda ölkəmizdə devalvasiya riski var? 

Mövzu ilə bağlı iqtisadçı ekspert Xalid Kərimli Hit.az-a açıqlama verib. O, indiki vəziyyətdə Azərbaycanda devalvasiya ehtimalının olmadığını deyib:
"Qonşu dövlətlərin rubl və lirə kimi pul vahidlərinin qiyməti zaman-zaman dəyişir. Lakin Azərbaycanda manat dollara fiks edildiyi üçün pulun ucuzlaşma ehtimalı vətəndaşlara qəribə gəlir. Çünki manatın dollara qarşı fiks edilmiş rejimdə olmasına vərdiş ediblər. 

Əslində, manatın qiyməti də qalxıb-düşməlidir. Burada qeyri-adi heç nə yoxdur. Yəni bu qiyməti bazar formalaşdırmalıdır. Lakin Mərkəzi Bank hələlik bunu məqsədəuyğun saymır. Manatın dollara fiks edilmiş rejimini mümkün qədər davam etdirməyə çalışılır". 

Ekspert 2025-ci ildə manatın məzənnəsinin sabit qalacağını proqnozlaşdırır:
"Təbii ki, devalvasiya ehtimalı həmişə var. Lakin indiki şərtlər daxilində ölkəmizdə bu ehtimal aşağıdır. Çünki  ölkənin ixrac gəlirləri, neftin və qazın qiyməti proqnozlaşdırılan səviyyədədir. Enerji qiymətlərinin və ixracımızın indiki səviyyəsi də manatın məzənnəsini qorumağa imkan verir. 

Ona görə də böyük ehtimalla, 2025-ci ildə manatın məzənnəsi 1 manat 70 qəpik kursunda qalmağa davam edəcək. Əgər neftin qiyməti kəskin aşağı düşər və ixrac gəlirlərimiz azalarsa, onda başqa vəziyyət yarana bilər. Lakin indiki situasiyada ciddi risk yoxdur".

Pərviz