Xarici təşkilatlar və Türkiyə banklarının nümayəndələri ilə görüşlər keçirilib
HİT.az xəbər verir ki, Azərbaycan Qiymətləndiricilər Cəmiyyətinin (AQC) sədri, Türk Dövlətləri Qiymətləndiricilər Birlikləri Şurasının (CAATS) prezidenti Vüqar Oruc Türkiyənin İstanbul şəhərinə işgüzar səfər edib.
Səfər çərçivəsində Vüqar Oruc ilə beynəlxalq daşınmaz əmlak, audit, qiymətləndirmə şirkəti olan “CBRE GROUP” şirkətinin Türkiyə nümayəndəliyi üzrə baş direktoru Önder Akpınar və Böyük Britaniyada qoyulmuş qiymətləndirmə və audit qurumu olan “RİCK” təşkilatının Türkiyə üzrə İmtahanların Münsiflər heyətinin sədri Vehbi Hariri arasında görüşlər keçirilib. “CBRE GROUP” şirkəti ilə keçirilən görüşdə AQC ilə təcrübə mübadiləsinin həyata keçirilməsi istiqamətində danışıqlar aparılıb. RİCS təşkilatı ilə Azərbaycan qiymətləndiricilərinin peşəkarlıq səviyyəsinin artırılması, ölkəmizdəki qiymətləndiricilərin RİCS təşkilatında imtahan vermə qaydaları kimi məsələlər müzakirə edilib.
Vüqar Oruc İstanbulda Türkiyənin bank sektoru nümayəndələri ilə də görüşlər keçirib. AQC sədrinin Türkiyənin aparıcı banklarından olan “VakıfBank”ın baş direktor müavini Kadir Karataş və qiymətləndirmə ekspertizası bölümünün rəhbəri Mustafa Akarça, “Halkbank”ın direktoru Gökay Özder və qiymətləndirmə ekspertizası bölüm rəhbəri Efsun Ela Yıldız ilə müxtəlif görüşləri baş tutub. Görüşlərdə Azərbaycanda son illər qiymətləndirmə sektorunda baş verən yeniliklər, AQC-nin bu istiqamətdə atdığı addımlar, CAATS təşkilatının yarandığı gündən gördüyü işlər, əldə edilən nailiyyətlər, CAATS-ın təşəbbüsü ilə Özbəkistanda Türk Dövlətləri Qiymətləndiricilərinin Dördüncü Konqresinin keçirilməsi və Konqresdə qəbul edilən qərarlar barədə məlumatlar verilib.“Halkbank” və “VakıfBank” nümayəndələri ilə görüşdə AQC-nin tabeliyində Bank Ekspert Şurasının yaradılması, Azərbaycanda fəaliyyət göstərən 17 bankın Şurada təmsil olunması, bununla da ölkədə qiymətləndiricilərlə bank sektoru nümayəndələri arasında əməkdaşlığın qurulması diqqətə çatdırılıb. Belə bir təcrübənin Azərbaycanda tətbiqi türkiyəli bank nümayəndələri tərəfindən böyük maraqla qarşılanıb. Onlar analoji təcrübənin Türkiyədə də tətbiqi istiqamətində addımlar atacaqlarını ifadə ediblər.
Səfər çərçivəsində Vüqar Oruc Türkiyə İnternet Media Birliyinin (TİMBİR) sədr müavini Adil Koçalanla da görüşü baş tutub. Görüşdə AQC-nin fəaliyyəti, “Azərbaycanda qiymətləndirmə fəaliyyəti” haqqında qanunun qəbul edilməsi, CAATS-ın həyata keçirdiyi tədbirlərlə bağlı məlumatlar bölüşülüb, türk dövlətlərinin müxtəlif istiqamətdə əməkdaşlıqlarının gücləndirilməsi və media dəstəyi ətrafında fikir mübadiləsi aparılıb.
