Mart ayının 14-dən etibarən pandemiya səbəbi ilə ölkədə bütün kütləvi tədbirlər, o cümlədən toy-nişan mərasimləri təxirə salınıb. İki aydır ki, kiminsə evindən "Vağzalı" səsi eşidilmir. Mövcud durumdan isə ən çox zərər çəkən heç şübhəsiz ki, şadlıq saraylarıdır. Belə ki, bu dövr ərzində toy və digər mərasimləri təşkil edə bilməyən şadlıq sarayları gəlirsiz qalıb. Düzdür, bu dövr ərzində sahibkarlara dövlət tərəfindən müəyyən qədər dəstək göstərildi, amma maraqlıdır şadlıq sarayının işçiləri - musiqiçilər, ofisiantlar və s. iki ay ərzində maaş ala bildilərmi? Yoxsa toy-nişan mərasimlərinin olmamamsı onları maaşsız qoydu

Modern.az mövcud sual ətrafında paytaxtda yerləşən şadlıq sarayları arasında sorğu keçirib:

“Neptun” şadlıq sarayından iki ay ərzində yalnız mühafizə xidmətinə pul verildiyini bildirdilər:

“İqtisadiyyat Nazirliyinin xətti ilə bəzi işçilərə iki ay müddətində kompensasiya ödənildi. Şadlıq sarayının rəhbərliyi yalnız sarayı mühafizə edənlərə 3 ay ərzində pul ödəyib. Dövlət hər bir işçinin adına hesab açdı və pul həmin hesaba köçürüldü. İşçilərə verilən əməkhaqqı isə bizim Sosial Fonda ödədiyimiz məbləğə əsasən müyyən edildi. Bu məbləğ də hardasa 112-113 manat civarında oldu. Mart ayında bildirdilər ki, aprel və may ayı üçün onlara pul tam şəkildə ödəniləcək, amma aprel və may aylarında da mart ayında aldıqları məbləğ qədər pul aldılar”.

“Cıdır Düzü” şadlıq sarayı isə karantin müddətdində öz hesabları imkanına işçilərin maaşını ödəyib:

“Rəhbərlik tərəfindən işçilərin maaşı iki ay ərzində ödənilib. Amma dövlət tərəfindən də onlara hər hansı məbləğ ödənilib ya yox, onu bilmirik”.

“Pluton Hall” şadlıq sarayında isə işçilərə dövlət tərəfindən pul ayrılsa da, rəhbərliyə karantin müddətində hər hansı yardım edilməyib:

“Dövlət tərəfindən şadlıq sarayının işçilərinin bir qisminə aylıq olaraq 120-125 manat pul ödənilib. Amma şadlıq sarayının rəhbərliyi bu müddət ərzində hər hansı kompensasiya almayıb”.

“Gilavar” şadlıq sarayında işçilərə iki ay ərzində həm dövlət tərəfindən, həm də saray rəhbərliyi tərəfindən təzminat ödənilib:

“Dövlət tərəfindən müəyyən miqdarda məbləğ ayrıldı və rəhbərliyə təqdim edildi. Rəhbərlik də həmin məbləğin üstünü tamamlayıb işçilərə ödədi”.

“Su Sonası” şadlıq sarayı iki ay ərzində işçilərinin maaşını tam şəkildə ödəyib:

“İki ay ərzində işçilərin maaşı tam şəkildə ödənilib. Amma eyni zamanda ofisiant, sarayda təmizlik işinə baxan şəxslər dövlət tərəfindən də diqqətdən kənar qalmadı. Belə ki, iki ay ərzində əksər işçilərimizə müəyyən qədər maliyyə ayrılıb pul ödənildi”.

“Kolizey” şadlıq sarayı karantin müddətində adi aylardan fərqli olmayaraq işçilərinin maaşını tam ödəyib:

“İki ay ərzində kiminsə maaşı rəhbərlik tərəfindən yarımçıq şəkildə ödənilməyib. İstər xadimə, istər musiqiçi karantin müddəti ərzində maaşını tam olaraq alıb”.

“Mega Palace” şadlıq sarayı daxili imkanlar hesbına işçilərinin aylıq maaşının yarısını ödəyib:

“İki ay ərzində işçilərimizin əməkhaqqısının yarısı dövlət tərəfindən ödənildi. Yerdə qalan məbləği isə rəhbərlik öz imianları hesabına həll etdi. Yəni karantin müddəti və toy olmamasına baxmayaraq, bütün işçilər bu dövr ərzində maaşlarını tam ala bilib”.