Qəbələdə Yeni il şənliyi zamanı “Şaxta baba” obrazında olan şəxsi döyməkdə təqsirləndirilən “Fortuna Boutique Hotel”in sahibi Samir Abdullayev barəsində inzibati tənbeh tətbiq edilib.
Qaynarinfo-nun əldə etdiyi məhkəmə qərarına əsasən, 1985-ci ildə Yevlax şəhərində anadan olan, ali təhsilli, evli, sahibkarlıq fəaliyyəti ilə məşğul olan Samir Abdullayev Azərbaycan Respublikası İnzibati Xətalar Məcəlləsinin 157-ci maddəsi ilə təqsirli bilinib.
Hadisə 2025-ci ilin dekabrında Qəbələ şəhərində, Heydər Əliyev prospektində yerləşən “Fortuna” otelinin restoranında baş verib.
Məhkəmə materiallarına görə, Yeni il şənliyi zamanı “Şaxta baba” obrazında çıxış edən Qəbələ rayonunun Mirzəbəyli kənd sakini Kamran Eyyubovla otelin icarədarı Eldar arasında mübahisə yaranıb. Mübahisə zamanı Kamran Eyyubov Eldarı itələyib. Bundan sonra Samir Abdullayev “Şaxta baba” obrazında olan şəxsə yaxınlaşaraq onun üz nahiyəsinə zərbə endirib.
Hadisə ilə bağlı əvvəlcə Samir Abdullayev və Eldar Əhmədov barəsində Azərbaycan Respublikası Cinayət Məcəlləsinin 221.2.1-ci maddəsi ilə cinayət işi başlanıb. Lakin sonradan cinayət işinə xitam verilib və əməldə İnzibati Xətalar Məcəlləsinin 157-ci maddəsində nəzərdə tutulan inzibati xəta əlamətlərinin olduğu qənaətinə gəlinib.
Məhkəmədə Samir Abdullayev özünü təqsirli bilməyib. O, hadisə günü oteldə şənlik keçirilmədiyini, “Şaxta baba” və “Qar qız” obrazlarının isə onun deyil, əvvəllər oteldə işləmiş şəxslərin təşəbbüsü ilə gətirildiyini bildirib.
Abdullayev iddia edib ki, münaqişə zamanı tərəfləri ayırmağa çalışıb və “Şaxta baba” obrazında olan şəxsi yalnız əli ilə kənara itələyib. Onun sözlərinə görə, hadisədən sonra qarşı tərəf ondan 1000 manat pul tələb edib.
Zərərçəkmiş Kamran Eyyubov isə məhkəmədə bildirib ki, Samir Abdullayev ona yumruqla zərbə vurub və nəticədə yerə yıxılıb. O, həmçinin Abdullayev və Eldar tərəfindən döyüldüyünü deyib.
Məhkəmə-tibbi ekspertizasının rəyinə əsasən, zərərçəkmişin sol gözaltı nahiyəsində qançır və sol diz oynağının ön səthində sıyrıq aşkarlanıb. Ekspertiza həmin xəsarətləri sağlamlığa zərər vurmayan bədən xəsarətləri kimi qiymətləndirib.
Məhkəmədə araşdırılan videogörüntüdə “Şaxta baba” obrazında olan şəxslə bir qızın oynadığı zaman Eldarın onların arasına girdiyi, bundan sonra Kamranın Eldarı əli ilə itələdiyi və Samir Abdullayevin Kamranın üz nahiyəsinə zərbə endirdiyi müəyyən olunub.
Məhkəmə Samir Abdullayevin əməlində İnzibati Xətalar Məcəlləsinin 157-ci maddəsində nəzərdə tutulan inzibati xətanın tərkibinin olduğunu hesab edib.
Qeyd edək ki, həmin maddəyə əsasən, döymə və sair zorakı hərəkətlərlə qəsdən fiziki ağrı yetirməyə görə 300 manatdan 500 manatadək cərimə və ya iki ayadək inzibati həbs nəzərdə tutulur.
Məhkəmə işin hallarını, Abdullayevin şəxsiyyətini, həmçinin məsuliyyəti yüngülləşdirən və ağırlaşdıran halların müəyyən edilməməsini nəzərə alaraq, ona maddənin maksimal həddində — 500 manat inzibati cərimə tətbiq edib.
Qeyd edək ki, Qəbələ şəhəri, Heydər Əliyev prospektində yerləşən “Fortuna” (Fortuna Boutique Hotel / Fortuna Resort Qebele) ailəvi istirahət mərkəzi və otel kompleksidir.
