Millimizin futbolçusu Mahir Emreli Polşanın paytaxtı Varşavaya yola düşüb.

23 yaşlı hücumçu bu gün ailəsi və yaxınları tərəfindən yola salınıb. Onu yola salanlar arasında Əməkdar jurnalist, AzTV sədrinin keçmiş müavini Rəşad Nəsirov da olub.

Mahir bu gün və ya sabah Polşa çempionu “Leqiya” ilə müqavilə bağlayacaq. Onun müqaviləsinin müddətinin üç illik olduğu bildirilir.

Futbolçumuz Varşava klubunda ilk məşqini iyunun 7-də keçirəcək. Daha sonra iyunun 16-da yeni komandası ilə birgə Avstriyaya təlim-məşq toplanışına yola düşəcək. Artıq iyunun 17-də “Leqiya”da ilk oyununa çıxa bilər (bu yoxlama oyunundakı rəqib hələ bəlli deyil).

İyunun 20-də “Leqiya” Azərbaycan çempionu “Neftçi” ilə yoxlama matçı keçirəcək. Sabiq “Qarabağ”lı kimi Mahirin “Neftçi”yə qarşı oyunu da maraqla gözlənilir. “Leqiya” iyunun 23-də isə UEFA Çempionlar Liqası qrup mərhələsinin iştirakçısı olmuş Rusiyanın “Krasnodar” klubu ilə üçüncü hazırlıq matçında görüşəcək.

İyunun 24-də Varşavaya qayıdacaq “Leqiya” öz təlim-məşq mərkəzində iki yoxlama matçı da keçirəcək. 30 iyunda Polşanın “Lexiya” və 3 iyulda “Visla” (Potsk) klubları rəqib olacaq.