Azərbaycan futbolsevərlərinin ən çox sevdiyi liqalardan biri də qardaş Türkiyənin Super Liqasıdır.

Ölkəmizdə kifayət qədər çox sayda türk klublarına azarkeşlik edən insanları görmək mümkündür. Bunların başında isə təbii ki, İstanbul klubları gəlir. "Qalatasaray", "Fənərbağça" və "Beşiktaş" azarkeşlərinin sayı bəlkə də milyonlarladır. Hal belə ikən, Türkiyə futboluna dair hər şey ölkəmizdə də maraqla qarşılanır. Əlbəttə ki, futbolu maraqlı edən faktorlardan biri də transferlərdir. Sizin üçün Türkiyədən xarici klublara satılan ən bahalı futbolçuların siyahısını hazırladıq.

HİT.az sözügedən siyahını təqdim edir:

1. Cenk Tosun 
"Tosun Paşa" ləqəbli futbolçu 2017-2018 mövsümündə "Beşiktaş"dan İngiltərənin "Everton" klubuna 22,5 milyon avroya transfer oldu. Bu, Super Liqanın indiyə qədər ən bahalı satışı olma rekordunu qoruyur.

2. Elvir Baliç
İkinci sırada isə "Fənərbağça" var. İstanbul klubu 1999-2000 mövsümündə Elvir Baliçi 21 milyon avroya İspaniya nəhəngi "Real Madrid"ə satıb.

3. Vedat Muriqi
"Fənərbağça" ilə davam edirik. Vedat Muriqi isə 2020-2021 mövsümündə Baliçlə eyni qiymətə - 21 milyon avroya İtaliyanın "Latsio" komandasına transfer oldu.

4. Arda Gülər
Siyahı yenə də "sarı bülbüllər"lə davam edir. Sırada son transfer sezonuna damğa vuran, "Barselona" və "Real Madrid"i qarşı-qarşıya gətirən futbolçu Arda Gülər var. O da 2023-2024 mövsümündə 20 milyon avro qarşılığında "Real Madrid"ə getdi.

5. Yusuf Yazıcı
2019-2020 mövsümündə isə "Trabzonspor"un ən sevilən futbolçularından olan Yusuf Yazıcı 18,5 milyona Fransanın "Lil" komandasına transfer oldu.

6. Kim Min Ce
Bahalı satışları ilə diqqət çəkən "Fənərbağça" 2022-2023 mövsümündə də transferdən yüksək gəlir əldə etməyə nail olub. İstanbul təmsilçisi cənubi koreyalı futbolçusunu İtaliyanın "Napoli" klubuna 18,05 milyon avroya satıb.

7. Elif Elmas
Qarşımıza növbəti dəfə "Fənərbağça" çıxır. 2019-2020 mövsümündə 16,20 milyon avroya Elif Elmas "Fənərbağça"dan İtaliyanın "Napoli" klubuna keçib.

8. Badou Ndiaye
"Qalatasaray" 2017-2018 mövsümdə Ndiayeni 16 milyon avro qarşılığında İngiltərənin "Stok Siti" klubuna satdı.

9. Musa Sov
"TOP-10"-dakı ən bahalı 10 satışın tam 6-sı "Fənərbağça"nın payına düşüb. Belə ki, komandanın bir dönəminə damğa vuran hücumçusu Musa Sov da 2015-2016 mövsümündə 16 milyon avroya Səudiyyə Ərəbistanının "Əl-Əhli" komandasına transfer olub.

10. Bruma
Böyük ümidlərlə "Qalatasaray"a gələn Bruma isə 2017-2018 mövsümündə 15 milyon avro qarşılığında İstanbul klubundan Almaniyanın "Leypziq" komandasına gedib.

Pərviz