Bütün dünyada futbol azarkeşlərinin Dünya Çempionatından sonra ən çox sevdiyi turnir məhz Çempionlar Liqasıdır.
Tarix boyu sözügedən liqada bir-birindən maraqlı hadisələr yaşanıb. Həmçinin, illər keçsə də unudulmayan oyunlara şahidlik etmişik. Bütün bunlarla yanaşı, bəzi rekordlar var ki, tarixə həkk olunub və hər zaman xatırlanır. Bəzi komandaların rekordları illər keçsə də təkrarlana və ya yenilənə bilmir. Bəs həmin rekord göstəricilər hansılardır?
HİT.az sizə Çempionlar Liqasının ən unudulmaz klub rekordlarını təqdim edir:
* İspaniyanın "Real Madrid" klubu bu turnirdə 14 dəfə çempion olaraq fantastik bir rekorda imza atıb.
* "Real Madrid" həmçinin, 2016, 2017, 2018-ci illərdə 3 il ardıcıl olaraq Çempionlar Liqasını qazanmaqla da keçilməsi çətin bir uğura nail olub.
* Çempionlar Liqası kuboku ən çox İspaniyaya (19) gedib. Belə ki, "Real Madrid" 14 "Barselona" isə 5 dəfə çempion olub. Həmçinin, ispan klubları 11 dəfə də ikinci olublar.
* Ən çox çempionluq və ikincilik yaşayan şəhər isə Madriddir. "Real Madrid" 14 dəfə çempion olmaqla yanaşı, 3 dəfə də ikinci olub. Həmçinin, "Atletiko Madrid" də onun qədər ikinci yeri tutub.
* Çempionlar Liqasında qruplara ən çox vəsiqə qazanan klub sayına görə də İspaniya birinci sıradadır. 13 fərqli ispan klubu Avropanın 1 nömrəli klub turnirində qruplarda mübarizə aparıb.
* Qeyd edək ki, qardaş ölkə Türkiyənin də 6 fərqli komandası Çempionlar Liqasının qruplarında iştirak edib.
* Bu turnirdə ən çox yarımfinala çıxan komanda ünvanı da 32 dəfə ilə "Real Madrid"ə məxsusdur.
* Heç məğlub olmadan Çempionlar Liqasını qazanan 5 komanda var: "Milan", "Liverpul", "Ayaks", "Mançester Yunayted" və "Bayern Münhen".
* Sözügedən turnirdə indiyə qədər sadəcə iki komanda birdən çox çıxdığı bütün finallarda qalib gəlib: "Nottingem Forest" (1979, 1980) "Porto" (1987, 2004)
* Ən uzun müddət ardıcıl Çempionlar Liqasına qatılma rekordu da "Real Madrid"ə aiddir - 19 mövsüm.
* Ən bol qollu qələbə rekordu isə Portuqaliyanın "Benfika" klubuna məxsusdur. "Benfika" 1965-ci ildə "Dudelange" komandasını 18-0 hesabı ilə məğlub edib. Turnir Çempionlar Liqası adlanandan sonra isə ən fərqli qələbə 8-0 olub. Sözügedən hesab 5 dəfə təkrarlanıb.
* Turnirin tarixində sadəcə bir komanda qrupda çıxdığı bütün matçlardan bərabərliklə ayrılıb. (AEK, 2002-2003)
* Çempionlar Liqası finallarında 8 dəfə eyni ölkənin komandaları qarşı-qarşıya gəlib.
* Turnirdə eyni şəhərin komandaları arasında sadəcə 5 matç keçirilib.
* İndiyə kimi 9 komanda qrupdan məğlub olmadan çıxıb.
* Turnir ərzində 22 komanda isə qrup mərhələsindəki bütün matçlarda məğlub olub.
Pərviz
