"Arda Turan oynadığı klublarda dünyanın sayılıb-seçilən baş məşqçiləri ilə çalışıb". 

Bu sözləri futbol mütəxəssisi Aslan Kərimov Hit.az-a açıqlamasında deyib. 

O bildirib ki, Arda Turan həmin mütəxəssislərdən bir çox şey götürüb:

"Təbii ki, o, daha sonra kurslarda məşqçilik yolunu keçərkən də bəlli şeylərə nail olub. Məsələn, Arda Turan çıxışlarında bəzən həqiqətən də türk futbolunda köhnə nəsil məşqçilərdə olmayan yanaşmalardan istifadə edir. Onun taktiki gedişləri və oyun anlayışı da müasirdir. Çünki Arda Turan müasir futbol haqqında "Atletiko Madrid" və "Barselona"da gördüklərini tətbiq etməyə çalışır. Onların məşq prosesini Türkiyəyə gətirib".

Ekspert vurğulayıb ki, uğur qazanmağın açarı yoxdur:

"Bütün addımları doğru atsan belə bəzən uğur qazanmaq olmur. Lakin Arda Turanın doğru yolda olduğuna əminəm. Onun Türkiyənin 4 böyük klubunun birinin, xüsusən də "Qalatasaray"ın baş məşqçisi olma ehtimalı həddin artıq çoxdur. 

Ancaq buna baxmayaraq, xarici klublarda işləmək ehtimalı bir qədər çətin görünür. Bəlkə də tanındığı üçün İspaniyada ortabab klubların birində məşqçi kimi çalışa bilər. Amma bunun üçün qardaş ölkədə hansısa nailiyyət əldə etməlidir". 

Aslan Kərimovun sözlərinə görə, Arda Turan taktiki savad baxımından Okan Burukdan öndədir:

"Arda Turanda tərəddüd etdiyim məqam çılğın olmasıdır. Zaman-zaman "Eyüpsor"un oyunlarında meydançanın kənarında həddindən artıq emosional və çılğın davranır. Bu isə onun uğur qazanmasını bir balaca gecikdirə bilər. 

Çünki bu qədər emosional olanda doğru qərarlar vermək çətinləşir. Futbolçu dövründə də çılğınlığı ilə seçilirdi. Bu, onun uğur qazanmasına əngəl törədə bilər. Lakin ümid edirəm ki, bu çılğınlığını idarə edə biləcək. Əgər bunu bacarsa, uğurlu baş məşqçi olacaq. Hətta Arda Turanın hazırda savad və taktiki baxımdan Okan Burukdan geri qalmadığını, hətta öndə olduğunu düşünürəm".

Pərviz